Sipas informacioneve të portalit serb “Kosovoonline”, që nga mëngjesi i sotëm në Strasburg, ku filloi seanca pranverore e Asamblesë Parlamentare të Këshillit të Evropës, në margjina janë zhvilluar diskutime intensive për çështjen e aplikimit të Kosovës, dhe se përveç Serbisë e cila po mundohet me çdo kusht ta pengojë aplikimin e Kosovës, aktivë janë edhe përfaqësuesit e vendeve të KUINT-it për ta futur në rend dite këtë aplikim.
Shefja e misionit serb në Këshillin e Evropës, Aleksandra Gjuroviq, ka thënë se “Serbia do të luftojë deri në fund që kërkesa e Kosovës për pranim në Këshillin e Evropës të mos përfshihet në agjendën e seancës së Komitetit të Ministrave”, transmeton Paparaci
Sot është thirrur seanca e jashtëzakonshme e APKE-së, për të cilën kanë insistuar më së shumti përfaqësuesit e Gjermanisë dhe Italisë. Fillimi i seancës është planifikuar për në orën 14:30.
Kosova aplikoi për pranim në Këshillin e Evropës në maj të vitit të kaluar dhe deri më tani ky aplikim ishte “në sirtar”.
Arsyeja e këtij nxitimi në lidhje me aplikimin e Kosovës për anëtarësim është ndoshta koha për të diskutuar këtë çështje në takimin e APKE-së, e më pas në Samitin e KE në Reikjavik, ku krerët e shteteve dhe qeverive të anëtarëve të organizatës mblidhen më 16 dhe 17 maj.
