Ministrja e Drejtësisë, Albulena Haxhiu, është përplasur me Ramush Haradinajn, pas deklaratave të kreut të AAK-së në foltore të Kuvendit ku ka thënë se nuk po luftohet krimi e korrupsioni nën këtë qeveri.
Haxhiu ia ka përmendur Haradinajt pasurinë e madhe që posedon dhe fakti se një prokuror, siç ka thënë ajo, e ka lëshuar vendin prej tij.
“Ndoshta ju kujtohet që në Republikën e Kosovës, prokurori special është detyruar ta lëshojë vendin për shkak teje Haradinaj. Sepse sa ke qenë kryeministër i ke caktuar brenda 30 ditëve të jap raport. Kjo është ndërhyrje brutale në sistemin e drejtësisë. Për shkak teje dhe qasjes tënde, ka ikur ai. Ti nuk ke të drejtë të flasësh për këtë çështje. Kur flasim për krim e korrupsion, vetëm me ta pa pasurinë tënde prej kur ke filluar të punosh në institucione e kuptojmë kush është i përfshirë”, ka thënë ajo.
Ndërkohë, Haradinaj ka thënë se i vjen keq të përdor ndonjë fjalor pasi ministrja e Drejtësisë është zonjë. Sipas tij, kryeministri Albin Kurti e ka krijuar modelin e korrupsionit me lidhje të shkurtra, me dosta dhe pjesë e tyre, sipas Haradinajt, është edhe Haxhiu.
“Me fol pas shpine nuk e di a është e drejtë. Vazhdimisht jam i penguar nga kjo zonjë kur flas në foltore. Kjo është zonjë, më vjen keq të përdor naj fjalor. Faleminderit për ato që i the. Albin Kurti me vetëdije e ka krijuar modelin e korrupsionit lidhje e shkurtër me dosta, në këta dosta është edhe ministrja. Unë i them Kosovës si vijon. Albin Kurti me vetëdije ka krijuar modelin e korrupsionit lidhje e shkurtë e dostave ku janë përfshirë njerëzit e besueshëm të tij, ku është edhe ministrja. Ju lutem mos shkoni në këtë rrugë se do të pësoni edhe vetë edhe Kosova”, ka thënë ai në Kuvend të mërkurën.
