Zëdhënësja e LDK-së, Sibel Halimi, ka reaguar pasi sot Glauk Konjufca, kryetari i Kuvendit, tha se Kosova s’ka çka kërkon në dialog nëse për Asociacionin nuk respektohet Kushtetuta.
Për më tepër, i pari i Kuvendit u shpreh se “nëse dialogu e ka çmimin e shkatërrimit të Kosovës, atëherë mirupafshim”
E për këto deklarata dhe procesin e dialogut në përgjegjësi, Halimi e quajti Qeverinë Kurti konfuze dhe të mjegullt.
“Qeveri konfuze dhe e mjegullt Strategjia e kësaj qeverie është jo vetëm e vonshme, por ka filluar t’i konstatojë veprimet e vonuara të vetvetes.
Pas pasojave, gjithmonë e krijojnë një gjendje tjetër – një realitet paralel – e që realisht kurrë nuk është kontinuiteti i asaj çfarë bëjnë. Fillimisht, të kënaqur me përfshirjen e vetmenaxhimit në Marrëveshjen e Ohrit, madje deri në glorifikim të saj, pastaj shkarkuan ekipin “vetmenaxhues” duke e projektuar si të dështuar”, shkroi ajo në Facebook.
“Rrjedhimisht, në mungesë të një fajtori kujdestar, të brendshme, ndezin turbo-makineritë kërkuese për fajtorë të tjerë, përjashtë. Kësaj radhe qenkan vendet e BE-së fajtore”, shtoi Halimi.
Sipas saj, Konjufca po konstaton se blloku i vendeve evropiane sikur po synojnë ta rrënojnë shtetin kosovar, duke kërcënuar me largim nga dialogu.
“Kryetari i Kuvendit të Kosovës konstaton se blloku i vendeve evropiane sikur po synuaka ta rrënojë shtetin kosovar duke kërcënuar me largim nga dialogu!? Ndonëse, si gjithmonë nuk e thotë kah do t’ia mbajë pastaj”, përfundoi Halimi.
