Drilon Gashi e Behar Mjekiqi, dy hoxhallarë të cilët në publik paraqiten si të moderuar, në të kaluarën kanë pasur problem me ligjin. Të dy për çështje të njëjtë për dhunë ndaj grave.
Behar Mjekiqi në dhjetorin e vitit të kaluar dyshohet se kishte ushtruar dhunë ndaj të dashurës së tij, ndërsa Drilon Gashi në vitin 2018 e kishte rrahur gruan e tij për çka edhe ishte gjykuar nga Gjykata Themelore në Pejë.
Drilon Gashi, këshilltar i kryekuvendarit Glauk Konjufca, i cili në publik njihet si hoxhë i moderuar në vitin 2018 e kishte rrahur gruan e tij, ai këtë e kishte pranuar edhe para Gjykatës Themelore në Pejë.
Për këtë vepër, ai ishte gjykuar nga Themelorja në Pejë i kishte shqiptuar vërejtje gjyqësore.
Bazuar në aktakuzë, pas një mosmarrëveshje ai kishte ushtruar dhunë fizike ndaj gruas duke e goditur me grusht dhe me dru, si pasojë viktima kishte përfunduar me lëndime trupore.
Gjykata Themelore e Pejës e kishte mbyllur rastin me një vërejtje gjyqësore duke u bazuar në rrethanat lehtësuese si pendimi, pajtimi me gruan dhe gjendja e rëndë ekonomike që ia pamundësoi pagimin e gjobës.
“Në shqyrtimin fillestar i pandehuri- pasi që paraprakisht i është lexuar aktakuza, është njoftuar me të drejtat dhe detyrimet procedurale, dhe pasojat e pranimit, përkatësisht mos pranimit të fajësisë. Drilon Gashi ka pranuar fajësinë dhe ka manifestuar keqardhje për atë se çfarë ka ndodhur. Këtë pranim të fajësisë, gjyqtari pasi që paraprakisht ka e ka marrë pëlqimin nga pakurori i shtetit dhe të dëmtuarës, i bindur se pranim-fajësinë i pandehuri e ka bërë ashtu siç e parasheh ligji – vullnetarisht pa u ndikuar nga askush dhe në asnjë mënyrë, e ka pranuar”, thuhet në vendim.
Në dhjetor të vitit të kaluar edhe Kreu i Bashkësisë Islame në Obiliq, Behar Mjekiqi, u denoncua për dhunë ndaj të dashurës së tij, me inicialet E.J., u arrestua nga Policia e më pas u lirua në procedurë te rregullt.
Mjekiqi dyshohej se e kishte larguar viktimën, me të cilën kishte lidhje dashurie, me dhunë nga shtëpia e tij në fshatin Mazgit. Dyshohet se e kishte shtyrë, e ka rrëzuar në tokë dhe e ka tërhequr atë zhagas drejt oborrit të shtëpisë.
Derisa e ka nxjerrë me dhunë nga shtëpia, imami Mjekiqi ia ka marrë telefonin viktimës E.J. duke i shkaktuar lëndime në të dy duart.
Sipas raportit që e ka siguruar Paparaci, E.J. ka ardhur në shtëpinë e imamit Mjekiqi në Mazgit të Obiliqit të dielën më 18 dhjetor.
Në ditën e tretë të qëndrimit në shtëpinë e imamit, ajo është larguar me dhunë nga shtëpia
Hoxha Behar Mjekiqi i cili dyshohet se kishte rrahur të dashurën e tij E.J, njihet për deklarimet e tij kundër dhunës.
Ai gjatë një interviste kishte thënë se njeriu nuk mund ta justifikojë dhunën e ndodhur, me arsyetimin se nuk ishte vetvetja.
“Duhet mbajtur veten nën kontroll. Islami thotë nëse je shumë nervoz e je në kambë ulu, e nëse je ulë e nuk të kalon lëviz, nëse nuk kalon merr abdes, falu namaz. Na nuk i kemi këto rregulla, prej nervozës kalojmë në diçka tjetër pastaj justifikohemi nuk kam qenë vetvetja, por nuk është e vërtetë. Po të mos ishte vetvetja do të përfundoje në izolim e psikiatri, e jo me nejt në burg tu lu shah me thanë valla s’kam qenë vetëvetja”, deklaronte dikur Mjekiqi.
