Ministrja e Jashtme e Francës, Catherine Colonna, deklaroi se kërkesa e Ukrainës për avionë luftarakë Rafale të prodhimit francez nuk duket e logjikshme. Në televizionin France 2, ministrja Colonna tha se shumë reforma themelore janë zbatuar në lidhje me anëtarësimin e Ukrainës në Bashkimin Evropian (BE) dhe njoftoi se kjo mund të ndodhë kur Ukraina të ketë përfunduar përgatitjet e saj dhe koha të jetë e përshtatshme.
Lidhur me kërkesën e Ukrainës për avionë luftarakë francezë Rafale, ministrja Colonna tha: “Nuk duket e logjikshme për momentin”. Duke komentuar rreth rolit të Kinës në përpjekjet për ndërmjetësim midis Rusisë dhe Ukrainës, Colonna u shpreh se Pekini nganjëherë i kushton vëmendje të madhe respektimit të parimeve bazë të OKB-së, duke shtuar: “Tani do të shohim nëse ata duan të marrin parasysh interesat legjitime të Ukrainës”.
Ndërkaq, për pjesëmarrjen e Bashar Assad-it në Samitin e Ligës Arabe të mbajtur në Arabinë Saudite, Colonna tha: “Ai është një lider që ka qenë armiqësor ndaj popullit të tij për më shumë se 10 vjet. Nuk ka asnjë arsye që Franca të bisedojë me të, nëse ai nuk ndryshon”.
Catherine Colonna deklaroi se Franca është në favor të gjykimit të Assad-it. Colonna tha se vazhdon kërcënimi i jashtëm terrorist gjatë Lojërave Olimpike të Parisit 2024, të cilat do të mbahen në Francë vitin e ardhshëm.
Duke iu referuar organizatës terroriste YPG/PKK, kryediplomatja franceze tha se “lufta kundër DAESH-it nuk ka përfunduar ende. Prandaj, ne duhet të mbrojmë aleatët tanë kurdë që janë efektivë në luftën kundër DAESH-it”.
