Nënkryetari i Lidhjes Demokratike të Kosovës, Lutfi Haziri, ka thënë se organizimi i zgjedhjeve në veri të Kosovës, pavarësisht bojkotit të komunitetit serb, është mësim që komuniteti atje dhe vetë Serbia si shtet me ndikim, të mos provojnë më politika destruktiva.
Sipas tij, pas bojkotit të komunitetit serb, veriu u bë i pakontrolluar si territor nga shteti i Kosovës.
“… Kur i ke katër kryetarë dhe administratë të vogël, sado që është, e përmirëson raportin tënd. E para, E bën me dije që nuk legjitimohen situata të tilla të bojkotit. Ju kujtohet rreziku i legjitimimit të barrikadave si metoda të protestës. Ka qenë shumë e rrezikshme. Unë mendoj se kjo është nxjerrë si mësim që me iu dëshmu, komunitetit dhe Serbisë si shtet që ka rol, që mos provoni me organizime të tilla, politika destruktive se në të ardhmen s’do të lejohen”, ka thënë Haziri në emisionin “Konfront” në KTV të enjten.
Sipas Hazirit, sekuencimi i marrëveshjeve të Brukselit dhe Ohrit kalon përmes normalizimit të veriut.
Ai ka thënë se me marrëveshjet e reja pritet “situatë të njëjtë”, sikur më 2013 kur ishte bërë marrëveshja për shpërbërje të strukturave paralele dhe integrim në strukturat shtetërore të Kosovës.
“Me marrëveshje pritet e njëjta situatë, sepse pritet kthim i të gjithëve përfshirë gjyqtarë e prokurorët”, ka thënë ai.
Ndërkaq analisti politik, Agim Sopi, integrimin e strukturave paralele e ka cilësuar si të rremë. Ai ka thënë se serbët kanë përfituar privilegje fantastike e se nuk ka pasur integrim real, vetëm bindje se aty ka sovranitet.
