Presidentja Vjosa Osmani ka thënë se Kosova po vazhdon të jetë në ballë të progresit në rajon dhe më gjerë sa i përket forcimit të sundimit të ligjit dhe demokracisë, si dhe promovimit të të drejtave të njeriut, të cilat tanimë po njihen ndërkombëtarisht. Këto komente presidentja Osmani i bëri në një takim me ministrin e Jashtëm të Maqedonisë së Veriut, Bujar Osmani, i cili është edhe njëherësh kryesues aktual i OSBE-së.
Në takim me ministrin Osmani, presidentja diskutoi për bashkëpunimin e institucioneve të Republikës së Kosovës me OSBE-në përgjatë viteve, raportet bilaterale me Republikën e Maqedonisë së Veriut, si dhe për zhvillimet e fundit politike dhe të sigurisë në rajon dhe më gjerë.
Ajo u informua mbi prioritetet e ministrit Osmani dhe Republikës së Maqedonisë së Veriut si kryesues të sivjetmë të OSBE-së, si dhe diskutuan mbi mbështetjen e OSBE-së për Republikën e Kosovës në të kaluarën, dhe bashkëpunimin aktual, në veçanti, presidentja Osmani ka përmendur vazhdimin e bashkëpunimit për fuqizimin e vajzave, grave dhe rinisë, me theks të veçantë në Agjendën për Gratë, Paqen dhe Sigurinë.
Tutje, Osmani shprehu përkushtimin e institucioneve të Republikës për vazhdim të bashkëpunimit të ngushtë me partnerët e saj për ta avancuar rrugën euroatlantike të vendit tonë, i cili mbetet prioritet shtetëror.
Në temën e raporteve bilaterale me Republikën e Maqedonisë së Veriut, Osmani ka vlerësuar rritjen e bashkëpunimit në mes të dy vendeve, si dhe përkushtimin e ndërsjellë për thellimin e mëtejmë të tyre.
Presidentja e Kosovës dhe ministri i Jashtëm i Maqedonisë së Veriut kanë folur edhe për dialogun me Serbinë, me ç’rast, Osmani ka theksuar shkeljet e vazhdueshme të Serbisë karshi marrëveshjeve të Brukselit, ndërsa ka përmendur angazhimin e Kosovës për paqe dhe stabilitet afatgjatë në rajon.
