Policia e Kosovës njofton se një zyrtar policor është lënduar sot dhe tri vetura janë sulmuar nga protestusit në Leposaviq, Zubin Potok dhe Zveçan.
Sipas një komunikate të lëshuar nga Policia e Kosovës, protestat filluan të tensionohen në orët e pasdites, kur disa persona të dyshuar kanë hedhur gurë në drejtim të automjeteve të Policisë së Kosovës, ku dy prej tyre iu janë thyer xhamat. “Si pasojë e sulmeve nga mjetet e forta një zyrtar policor ka pësuar lëndime”, është shkruar në këtë komunikatë.
Policia ka përmendur se gjatë ditës disa “grupe kriminale” i kanë penguar disa gazetarë në kryerjen e detyrave të tyre, dhe automjetet e tyre janë vandalizuar. Ajo u ka bërë thirrje protestuesve që të përmbahen nga dhuna.