Kryeministri i Shqipërisë, Edi Rama, ka përshëndetur vendosjen e kërkesave nga Bashkimi Evropian për zgjidhjen e tensioneve në veri të Kosovës.
Të enjten, BE-ja bëri të qartë tri kërkesa për Kosovën e Serbinë. Ndërkombëtarët kanë kërkuar zgjedhje të reja në veri menjëherë, sigurimin e pjesëmarrjes së serbëve të Kosovës në to dhe nisjen e themelimit të Asociacionit të komunave me shumicë serbe.
Pas kësaj, Rama ka falënderuar presidentin e Francës, Emmanuel Macron, dhe kancelarin gjerman, Olaf Scholz, për ndërmjetësimin në takimin e sotëm mes presidentëve të Kosovës dhe Serbisë dhe caktimin e kërkesave.
“Nuk mund t’i falënderoj mjaftueshëm Macronin dhe Scholzin për atë që po bëjnë për ta finalizuar procesin e normalizimit në mes të Kosovës dhe Serbisë. T’i shohësh se si ulen me respekt me të dyja palët në përpjekje për të zgjidhur konfliktin absurd, i thotë të gjitha për shpirtin e tyre të madh evropian. Faleminderit”, ka shkruar ai në Twitter.
“Po ashtu përgëzoj Vjosa Osmanin që bisedoi direkt me Vuçiqin dhe vërtetë shpresoj që këto tri kërkesa përmbushen shpejt ashtu që ky konflikt absurd të përfundojë para se të dëmtohet pariparueshëm lehtë reputacioni i Kosovës dhe integrimi i saj në komunitetin demokratik”, ka shtuar ai.
