Plani është që gradualisht të arrihet një ndalim pothuajse total i duhanit
Qeveria e Zelandës së Re njofton se cigaret elektronike me përdorim të vetëm dhe aromat joshëse do të ndalohen nga gushti për të kufizuar dëmtimin për shëndetin e të rinjve. Të kritikuara për ndikimin e tyre mjedisor dhe dëmtimin e shëndetit të të rinjve, cigaret elektronike një përdorimshe dhe aromat joshëse do të ndalohen nga gushti. Kështu ka bërë të ditur ministrja e Shëndetësisë, Ayesha Verrall, duke theksuar se dëshiron të mbrojë adoleshentët. Sipas një studimi të vitit 2021 nga Fondacioni i Astmës dhe Frymëmarrjes, pothuajse një në pesë adoleshentë të moshës shkollore pinë një cigare elektronike të paktën një herë në ditë në Zelandën e Re. “Shumë të rinj po perdorin cigaret elektronike, prandaj ne po marrim masa për të parandaluar që kjo të ndodhë. Cigaret elektronike për një përdorim do të ndalohen në Zelandën e Re nga gushti”, tha Verrall. Zelanda e Re synon të arrijë gradualisht një ndalim pothuajse total të duhanit. Cigaret elektronike të disponueshme do të konsiderohen ato që nuk kanë bateri të lëvizshme ose të zëvendësueshme. Tani do të ndalohet gjithashtu hapja e një dyqani të cigareve elektronike pranë një shkolle ose një “marae”, një emër që u jepet vendeve ku mblidhen Maori.
Ministrja Verrall shpjegoi se qeveria synon të gjejë ekuilibrin e duhur midis nevojës për të parandaluar të rinjtë që të fillojnë të pinë duhan dhe asaj për t’i lejuar duhanpirësit t’i përdorin për ta lënë duhanin. Gjashtë muaj më parë, Zelanda e Re njoftoi se do të ndalonte shitjen e cigareve për këdo që aktualisht është nën moshën 14 vjeç, duke rritur moshën e pirjes së duhanit çdo vit për të mbuluar të gjithë popullsinë. Shkalla e duhanpirjes së të rriturve në Zelandën e Re është tashmë relativisht e ulët në 8%. Kryeministri Chris Hipkins megjithatë ka thënë se kufizimet e reja janë të nevojshme për të rinjtë. “Ne kemi dëgjuar nga prindërit, mësuesit dhe drejtorët e shqetësuar se një zakon i keq gjatë gjithë jetës po përhapet te shumë njerëz në moshë të re,” tha Hipkins. Kufizimet vijnë një muaj pasi Australia fqinje njoftoi masa të ngjashme për duhanpirjen, me qeverinë që akuzoi industrinë e duhanit se e bën gjeneratën e ardhshme të adoleshentëve “të varur nga nikotina”.
