Presidenti i Serbisë i kërkoi Kosovës ditën e sotme që të mos organizojë zgjedhje të reja për kryetarët e komunave në veri të saj derisa t’u jepet më shumë autonomi serbëve etnikë që formojnë shumicën në këtë zonë.
“Të gjithë serbët në veri mendojnë për Serbinë si vendin e tyre, jo Kosovën. Ky është realiteti. Dikush duhet të marrë një kontroll dhe të organizojë zgjedhje të reja atje “, tha presidenti serb Aleksandër Vuçiç në një intervistë për Reuters në Beograd.
Dhuna u ndez në veri të Kosovës javën e kaluar pasi kryetarët shqiptarë etnikë u vendosën në detyrë në disa komuna me shumicë serbe pas zgjedhjeve lokale të prillit që tërhoqën një pjesëmarrje prej vetëm 3.5%.
Në përgjigje të trazirave, në të cilat protestuesit serbë u përleshën me paqeruajtësit e NATO-s, duke lënë dhjetëra të plagosur nga të dyja palët, Serbia vendosi forcat e saj të armatosura në gatishmërinë më të lartë luftarake dhe NATO dërgoi përforcime në misionin e saj në Kosovë.
Bashkimi Evropian dhe Shtetet e Bashkuara, mbështetësit më të fortë të Kosovës, i kanë kërkuar Prishtinës që të organizojë zgjedhje të reja në zonën me shumicë serbe për të zbutur tensionet dhe Serbia të heqë gatishmërinë e saj luftarake dhe të largojë trupat nga kufiri me Kosovën.
Por Vuçiç tha se autoritetet në Kosovë do të duhet të bëjnë disa lëshime për të siguruar pjesëmarrjen serbe në një votim të ri.
“Ne ende nuk kemi një asociacion të komunave serbe, ende nuk ka tërheqje të forcave speciale të policisë së Kosovës dhe kryetarëve të komunave atje,” tha ai.
Një marrëveshje e vjetër, e ndërmjetësuar nga Bashkimi Evropian, parashikoi që serbët në veri të themelonin një asociacion të komunave vetëqeverisëse në këmbim të njohjes së institucioneve të Kosovës, por marrëveshja nuk u zbatua kurrë.
Kryeministri i Kosovës, Albin Kurti, ka thënë se nëse i jepet autonomi më e madhe nën asociacionin e komunave, zona me shumicë serbe mund të organizojë një referendum për t’iu bashkuar Serbisë.
“Serbët në veri janë gjithmonë të gatshëm të bisedojnë, por ju duhet t’u ofroni atyre diçka”, tha Vuçiç.
Presidentja e Kosovës Vjosa Osmani i tha Reuters në fillim të këtij muaji se vendi mund të zhvillojë zgjedhje të reja në komunat në fjalë nëse 20% e votuesve nënshkruajnë një peticion duke i kërkuar ato. Ajo akuzoi gjithashtu Serbinë për ndërhyrje.
Në përgjigje, Vuçiç tha se deklarata të tilla janë të tmerrshme dhe akuzoi Kurtin se nuk ishte i gatshëm për kompromis.
“Jam i sigurt që Kurti nuk do të investojë asnjë minutë nga koha e tij dhe as një pikë djerse për të gjetur një zgjidhje kompromisi”, tha ai.
Vuçiç u shpreh se Serbia po shqyrtonte opsionin nëse do të ulë gatishmërinë e saj luftarake.
“Ne do t’i mbajmë trupat tona në gatishmëri të lartë, por jo në gatishmërinë më të lartë luftarake, sepse kjo kushton shumë”, tha ai.
Vuçiç i tha gjithashtu Reuters se Beogradi ishte në bisedime për të blerë avionë luftarakë Rafale nga Franca dhe për të forcuar më tej ushtrinë e tij me armë perëndimore.
Ai tha se Serbia mbetet në rrugën e anëtarësimit në BE dhe kishte arritur të balancojë politikat e saj të jashtme për të lejuar vazhdimin e marrëdhënieve miqësore me aleatin historik Rusinë dhe me Kinën
