Në gjykimin ndaj ish-krerëve të Ushtrisë Çlirimtare të Kosovës (UÇK) Hashim Thaçi, Kadri Veseli, Rexhep Selimi dhe Jakup Krasniqi, po vazhdon marrja në pyetje e dëshmitarit të njëmbëdhjetë.
Marrja në pyetje e tij nga ana e prokurorit special James Pace është duke vazhduar në seancë të mbyllur për publikun.
Të martën, në fillim të seancës kryetari i trupit gjykues, gjykatësi Charles Smith ka lajmëruar se ekipet e mbrojtës e kanë shkurtuar kohën në marrje në pyetje të këtij dëshmitari në më pak se 2 orë.
Ish-presidenti Hashim Thaçi, ish-kryeparlamentarët Kadri Veseli e Jakup Krasniqi, si dhe ish-shefi i deputetëve të Vetëvendosjes, Rexhep Selimi, akuzohen për ndërmarrje të përbashkët kriminale lidhur me vrasje, tortura e trajtim mizor në rreth 40 qendra ndalimi në periudhën 1998–1999.
Për këto krime të pretenduara, ZPS-ja pretendon se katër pjesëtarët e Shtabit të Përgjithshëm ishin në dijeni ose kanë pasur arsye të jenë në dijeni.
Ata akuzohen edhe për pjesëmarrje direkte në frikësim, marrje në pyetje dhe keqtrajtim të të ndaluarve nëpër qendra ndalimi. Akuzat i kanë mohuar në tërësi Thaçi, Veseli, Selimi e Krasniqi, e po ashtu edhe mbrojtësit e tyre.
