Aleanca për Ardhmërinë e Kosovës është rreshtuar pas kryeministrit të Shqipërisë, Edi Rama, të cilit i japin të drejtë për akuzat dhe vërejtjet ndaj kryeministrit të Kosovës, Albin Kurti. Tani AAK-ja i kërkon Kurtit që ta dëgjojë Ramën. Për këtë temë u pozicionuan Daut Haradinaj dhe pal Lekaj.
Kryetari i Aleancës për Ardhmërinë e Kosovës, Ramush Haradinaj kërkon shkarkimin e kryeministrit Albin Kurti, aq sa beson se kjo do ta shpëtonte vendin. Megjithatë, kjo duket se s’është e mundur tani. Por po aq alarmante situatën e sheh edhe kryeministri i Shqipërisë, Edi Rama, i cili tha se Kurti duhet të bëjë hapa prapa dhe t’i dëgjojë kërkesat e ndërkombëtarëve.
Më 13 qershor, Rama për herë të dytë brenda një jave doli në një konferencë të jashtëzakonshme për media për të folur për situatën në Kosovë. Njoftoi për anulimin e mbledhjes së përbashkët të dy qeverive, që ishte paraparë të mbahej të nesërmen. “Shqipëria nuk mund të luajë teatër nesër” tha ai duke shtuar se “Kosova po digjet për një të vetëvendosur të vetëburgosur”.
Rama foli si në emër të bashkësisë euroatlantike, duke paralajmëruar sanksione ndaj Kosovës në rast se kryeministri i saj nuk ndryshon qëndrim.
“Jemi 100 % kundër mënyrës se si vepron Kurti”, nënvizoi Rama dhe theksoi se “nuk ka asnjë shans që Shqipëria të zhvendoset nga boshti i bashkësisë euro-atlantike” për Albin Kurtin.
Paraprakisht, në një konferencë për media më 8 qershor, ai tha se e ka dërguar në Bruksel dhe në Ëashington një draft-statut për Asociacionin e komunave me shumicë serbe, gjë që u kundërshtua nga pushteti në Kosovë.
AAK-ja – Kurtit: Dëgjoje Ramën
Ramush Haradinaj nuk e arsyeton sjelljen e kryeministrit Albin Kurti në raport me ndërkombëtarët dhe situatën e tensionuar së fundmi, ashtu sikurse kryeministri i Shqipërisë, Edi Rama.
Sa ishte kryeministër i vendit, Haradinaj ishte përplasur fort me Ramën dhe e akuzonte homologun e tij nga Tirana se po i bënte presion në sy të liderëve europianë që ta hiqte tarifën 100% që e kishte vendosur për produktet që vinin nga Serbia. Përplasjet kishin mbërritur deri në akuza për tradhti ndaj kombit.
Por raportet e Haradinajt me Ramën u ndreqën pasi kreu i AAK-së u kthye në opozitë. Dhe tash, kjo parti i ka dhënë mbështetje të plotë Ramës, ndërsa ky i fundit në disa reagime së fundmi i ka kërkuar Kurtit që t’i dëgjojë ndërkombëtarët dhe të bashkëpunojë me ta.
AAK-ja ka disa ditë që ka iniciuar një mocion për ta rrëzuar kryeministrin Albin Kurtin. Një ditë pas konferencës së dytë për media të Ramës, AAK-ja mbajti një mbledhje dhe mëpas Ramush Haradinaj doli në një konferencë për media.
“Kurti intensivisht me çdo veprim të vetin po e prishë këtë aleancë; pra ky ose është spiun i Serbisë ose është ai që me zor do me mbetë në pushtet sa me e fshehë qeverinë e tij humbëse të zhytur në korrupsion e nepotizëm, e po e kërkon shpëtimin në kriminelë, duke i arrestuar ata e duke na e shitur këtë si fitore të Kosovës”, tha Haradinaj. Tha se “është momenti par ta ndalur Kurtin”, duke paralajmëruar rrezik për sigurinë e vendit.
Rama të hënën kërkoi që Serbia t’i lirojë këtë javë tre policët e Kosovës të rrëmbyer të mërkurën ndërsa paralajmëroi Serbinë se kjo “do jetë java e rikthimit të akullit mes nesh” nëse ajo gjë nuk ndodh. Por tha gjithashtu se “situata mund të agravohet” më shumë nëse kryeministri Albin Kurti “këmbëngul në të tijën kundër aleatëve”. Kryeministri shqiptar i kërkoi homologut të tij në Prishtinë që të dalë nga “guacka e vetizolimit” dhe të mos e humbasë veriun.
AAK-ja i dha të drejtë Edi Ramës edhe një herë. Daut Haradinaj tha se kryeministri i Shqipërisë “duhet përgëzuar për qëndrimin dinjitoz”.
“Albin Kurti fatkeqësisht po rrëshqet në humbjen e kontrollit aq sa kishte në veri, po e humb mbështetjen e aleatëve tanë dhe kësisoj po e nxjerr nga fundosja Vuqiçin dhe po e dëmton Kosovën”, shkroi ai në Facebook.
Edhe deputeti i AAK-së, Pal Lekaj tha të hënën se Kurti duhet ta dëgjojë Ramën.
“Janë këshilla të mira që duhen pranuar, por ne kemi një kryeministër që është kokëfortë dhe po i shkakton jo-stabilitet vendit me veprimet tij, që nuk janë të dobishme”, tha ndër tjerash Lekaj në ABC Neës.
Haradinaj dikur s’e dëgjonte Ramën
Si kryeministër i Kosovës, Ramush Haradinaj mbahet në mend për tarifën që e vendosi për produktet serbe dhe për përplasjen deri në sharje e padi që e kishte pasur me kryeministrin e Shqipërisë, Edi Rama.
Sikurse tani Kurtit, Rama i kishte kërkuar Haradinajt që t’i dëgjonte ndërkombëtarët dhe ta hiqte tarifën ndaj produkteve serbe. Përplasjet shkuan aq larg sa raportohej se kishte pasur edhe sharje mes tyre kur siç rrëfente Haradinaj, në një rast Rama i bënte presion në sy të liderëve europianë. Ishte takimi i liderëve të Ballkanit në Berlin që në praninë e kancelares së atëhershme gjermane, Angela Merkel dhe presidentit francez, Emmanuel Macron ngjarja që kujtohet si përplasja më e madhe ndërmjet një kryeministri të Kosovës dhe një kryeministri të Shqipërisë.
Rama e përshkroi sikur Haradinaj aty “e humbi rastin historik t’ia hiqte vizat Kosovës”, ndërsa Haradinaj e kishte pranuar se kishte pasur përplasje me zë të lartë, por jo me Merkelin e Macronin, por me Ramën. “Jam detyruar ta mbrojë tokën time nga vëllai im Edi Rama”, shprehej ai.
Rama dikur e paditi Haradinajn. Në padi thuhej se në tetor të vitit 2019, ish-kryeministri i Kosovës “ka kryer deklarim publik të fakteve shpifëse e mashtruese në adresë të Paditësit me pasojë cenimin e nderit, personalitetit, reputacionit dhe dinjitetit të Paditësit me pasojat e parashikuara në legjislacionin e zbatueshëm”.
Për Haradinajn, kjo s’ishte më shumë se veç një përpjekje e Ramës për t’i ikur përgjegjësisë dhe e akuzonte sërish se ai kishte pë qëllim ndarjen e Kosovës.
“Padia e Kryeministrit Rama është plotësisht e pabazuar dhe një diversion politik që bëhet nga ana e tij, që të fshihet pas dramave mediale dhe t’i ikë përgjegjësisë. Kombi ynë dhe Kosova ka njerëz që i dalin zot në çdo kohë” shprehej Haradinaj.
Por në verën e vitit 2020, Rama e hoqi padinë ndaj Haradinajt, që tash e konsideronte “një prej figurave historike”. Dy vjet më pas, Rama e priti Haradinajn në zyrën e tij në Tiranë. Ky i fundit e falënderoi Ramën për ndihmën ndaj Kosovës.
