Deputeti i Partisë Demokratike të Kosovës, Hisen Berisha, ka thënë nëse nesër [e enjte] serbët do t’i kalojnë elementet kulturore gjatë festës së Vidovanit, atëherë sipas tij, gjuha e ligjit flet qartë dhe organet përgjegjëse do duhet të kryejnë punën e tyre.
“Zhvillimet në Kosovë, nëse fokusohemi te incidentet, ato janë ndaj të cilave duhet të reagojnë organet përgjegjëse të ligjit. Sa i përket zhvillimeve të karakterit emocional, festiv që do të jenë nesër, ato duhet parë nga shumë prizma. Nga prizmi që t’i shohim si veprime të karakterit kulturor dhe besimit. Nëse shfaqen elemente që kalojnë kulturën, gjuha e ligjit është e qartë. Kosova ka ligje. Është shtet i pavarur. Çdo shpërfaqje që nxit urrejtje nacionale, dënohet nga ligjit”, ka thënë Berisha në “Konfront” të KTV-së.
Deputeti i PDK-së ka bërë thirrje që qytetarët dhe forcat e sigurisë ta ruajnë qetësinë që mos bien pre e ndonjë provokimi.
Sipas Berishës, Graçanica është zgjedhur si vend për ta festuar Vidovanin e sivjetshëm për shkak se Beogradi zyrtar po do t’i përfshijë edhe serbët në Kosovë që jetojnë të qetë dhe nuk u binden urdhrave të tyre.
