Një pikë statike (kontejner) e Policisë së Kosovës është djegur sot rreth orës 03:00 të mëngjesit te tre rrokaqiejt në veri të Mitrovicës.
Lajmi është konfirmuar edhe nga zëvendëskomandanti i Policisë së Kosovës për rajonin e Veriut, Veton Elshani.
Ai tha se nuk ka të lënduar dhe se janë shkaktuar dëme materiale.
Elshani po ashtu ka konfirmuar raportimin e Mitropol-it se pak para mesnatës pjesëtarët e Njësisë Speciale të Policisë së Kosovës në pjesën veriore të Mitrovicës kanë tentuar të ndalojnë veturën e drejtuar nga një person.
“Shoferi nuk iu bind urdhrit të punonjësve të Policisë dhe vazhdoi tutje. Policia e ka ndjekur dhe ka gjetur një automjet të braktisur në rrugën ‘Sutjeska’. Vetura është kontrolluar dhe më pas policia është larguar nga vendi i ngjarjes”, shtoi ai.
