Pandemia e koronavirusit, lufta ruse në Ukrainë dhe fluksi i mijëra refugjatëve nga Ukraina drejt Gjermanisë, kanë ndihmuar në suksesin e AfD-së. Ndërkaq, temat e rënda si migracioni, i ka shfrytëzuar një kandidat i partisë së djathtë ekstreme, duke fituar zgjedhjet në një qytet në pjesën lindore të Gjermanisë.
Mike Knoth është më shumë se i lumtur që kandidati i partisë së djathtë ekstreme ka fituar zgjedhjet në pjesën rurale në lindje të Gjermanisë për herë të parë që prej periudhës së nazizmit.
Gjermani është i lodhur nga partitë e mëdha, nuk u beson mediave dhe thotë se shteti është mbushur me migrantë. Partia e së djathtës ekstreme “Alternativa për Gjermaninë”, ose AfD, shpreson ai, do të përmirësojë gjithçka që nuk ka shkuar mirë në Sooneberg, sipas tij. Ky qytet është në juglindje të shtetit gjerman Thuringia.
“Mendoj se fakti që shumë njerëz kanë votuar për Alternativën për Gjermaninë tashmë i ka dhënë legjitimitet”, thotë 50-vjeçari Knoth.
Mirëpo shumë banorë të Sonnebergut nuk janë të kënaqur me retorikën nacionaliste dhe antidemokraitke të AfD-së.
Margret Sturm, optometriste, familja e së cilës ka shitur syze për më shumë se 60-vjet në Sonneberg, ka shprehur shqetësimin e saj për fitoren e AfD-së.
“U kam thënë atyre se nuk është mirë që po votojnë për AfD-në. Kushdo që ka votuar AfD-në duhet ta dijë se prapa tyre janë nazistët”, thotë Sturm.
Ajo nuk mund të marrë me mend se çfarë ndodhi pas transmetimit të intervistës së saj në televizionin gjerman.
“Morëm mesazhe urrejtjeje, telefonata kërcënuese, çdo minutë. Jemi sharë nga njerëzit që as nuk i njihnim e s’na njihnin, që nuk e dinë për biznesin tonë”, thotë ajo.
Kërcënimet ishin aq të pamëshirshme sa bashkëshorti i Sturmit ka vendosur kamera brenda dyqanit. Mirëpo Sturm, 60-vjeçare, thotë se nuk do të lërë askënd që ta mbajnë të heshtur.
Ajo thotë se banorët e tjerë që kanë kundërshtuar AfD-në më nuk shprehin kritikat e tyre hapur.
Stephan Kramer, shef i agjencisë shtetërore të inteligjencës së brendshme të Thuringias në qytetin Erfurt, në vitet e fundit ka mbikëqyrur aktivitetet e partisë së djathtë ekstreme.
Kramer për vite të tëra ka paralajmëruar se dega e AfD-së në Thuringia është shumë radikale dhe se ishte vendosur në mbikëqyrje zyrtare para më shumë se dy vjetësh si grup “i provuar i ekstremizmit të djathtë”.
Mirëpo Knoth nuk shqetësohet se AfD-ja është nën mbikëqyrje të agjencisë së inteligjencës për shkak të lidhjeve me ekstremistët e djathtë.
“Është zgjedhur në mënyrë demokratike, nuk shoh asgjë të keqe në këtë”, thotë ai.
Knoth pret që AfD-ja të ketë qasje “rend dhe ligj”, të ndal migrimin dhe ta bëjë Gjermaninë më të sigurt.
Përballja me migrimin ose luftimi i krimit janë tema të rënda që i përkasin administratorit lokal, por Robert Sesselmann me fushatën me këto tema doli të jetë i suksesshëm.
Zgjedhjet në Sonneberg që u mbajtën në muajin qershor e vendosën Sesselmannin përball rivalit të qendrës së djathtë, Jürgen Köpper. Sesselmann fitoi me 52.8 për qind, ndërkaq rivali përfundoi me 47.2 për qind.
Sonnebergu ka popullsi prej 56 mijë e 800 banorësh, mirëpo fitorja ishte një sukses simbolik për AfD-në.
Alternativa për Gjermaninë për herë të parë hyri në Bundestag në vitin 2017 pas fushatës kundër migrantëve që e realizoi si reagim për ardhjen masive të refugjatëve në Evropë.
Partia, dhjetë vjet e vjetër, në sondazhe ka arritur në nivele rekorde mes 18 dhe 20 për qind të përkrahjes në nivelin kombëtar.
Në fillim të viteve ’30, Thuringia ishte një prej bastioneve të para të Partisë Nacionale Socialiste të Adolf Hitlerit. Në ditët e sotme, AfD-ja u bën thirrje sidomos gjermanëve në landet ish-komuniste dhe më pak të begata lindore, si Thuringia.
