PDK fut në Kuvend fotografi të mëdha të Kurtit dhe Kusarit me hundën e Pinokios

Deputetët e PDK-së kanë bllokuar foltoren e Kuvendit, ndërsa janë shpalosur edhe dy fotografi të mëdha të Kryeministrit Albin Kurti dhe Shefes së Grupit Parlamentar, Mimoza Kusari, me hundën e zgjatur.

PDK-ja, paraditen e sotme e vendosi një fotografi të ngjashme të Kurtit para foltores së Kuvendit, por atë e shqyu zëvendëskryeministri Besnik Bislimi. Kjo çoi në një përleshje fizike mes pjesëtarëve të Qeverisë Kurti dhe deputetëve të PDK-së.

Deputetët e PDK-së e kanë bllokuar foltoren, pasi po refuzojnë propozimin e Kryeparlamentarit Glauk Konjufca, që seanca e sotme të vazhdojë me diskutime të tjera, duke u tejkaluar diskutimi që përfundoi me përleshje fizike, e që kishte të bënte me audio-incizimet e Mimoza Kusarit dhe Slavko Simiqit.