Ishte-deputeti i VV-së, Afrim Kasolli, ka dënuar ashpër veprimin e djeshëm të zëvendëskryeministri Besnik Bislimi, i cili e gjuan me shishe deputetin e PDK-së, Mergim Lushtaku.
Ai ka thënë se Bislimi më nuk duhet të lejohet të futet në sallën e Kuvendit.
Në profilin e tij në “Facebook”, Kasolli ka shkruar se veprimi e të dytit të Qeverisë dëshmon se ai udhëhiqet nga frika.
“Nëse kjo shoqëri ia lejon vetes të udhëhiqet edhe më tutje nga Besnik Bislimi e shënon fundin e saj moral dhe demokratik. Dhe këtë për mënyrën se si e ekzekutoi aktin e shëmtuar dje. Ky veprim dëshmon se si zv. kryeministri udhëhiqet nga frika. Sepse sikur ai ta kishte sulmuar një deputet të Kuvendit, por të kishte qëndruar në ulësen e tij, kjo do te ishte tjetër gje. Përsëri si akt i dënueshëm, por jo sikurse ky dje”, ka shkruar Kasolli.
Ai ka bërë me dije se opozita duhet të insistojë që Bislimi më të mos lejohet të futet në sallën plenare të Kuvendit.
“Por mënyra tinëzare se si kërkon të struket pas veprimit, dëshmon se si ai drejtohet nga frika. Dhe këtë frikë kërkon ta kompensojë nëpërmjet dhunës. Prandaj, Besnik Bislimi e kërkon sigurinë e tij vetëm pas fuqisë së tjerëve, qofshin këta individ sikur se lideri, struktura institucionale, aparati i dhunshëm i shtetit etj etj. I nxitur nga kjo paranojë dhe ankth personal në kërkim të fuqisë ai dje edhe dhunoi demokracinë në Kosovë . I uzurpoi kompetencat e Kryeparlamentarit. Sepse për mbarëvajtjen e seancës askush tjetër nuk është kompetent pos atij. Nëse opozita nuk mbron qëndrimin që ai më kurrë nuk duhet të lejohet të futet në seanca të Kuvendit bëhet bashkëfajtore për këtë kapitullim politik të demokracisë . Natyrisht, Kryeministri Kurti nuk e shkarkon, sepse atij i duhen njerëz që ndjehen të sigurt nën ombrellën e pushtetit të tij. Ai mund ta sakrifikojë ata vetëm nëse e ndjen që po i rrezikohet pushteti i tij”, ka shkruara ai.
