Ministri i Financave, Hekuran Murati, ka kritikuar vendimin e Aleancës për Ardhmërinë e Kosovës që e çoi në Gjykatën Kushtetuese Ligjin për pagën minimale, duke thënë se sa ishin në pushtet nuk e rritën pagën minimale e tash, sipas ministrit, po tentojnë ta bllokojnë.
Të premten, AAK-ja çoi në Kushtetuese Ligjin për pagën minimale që u miratua në Kuvend javën e kaluar. Presidentja Vjosa Osmani ka konfirmuar se nuk do ta dekretojë Ligjin pa vendim të Kushtetueses.
E ministri i Financave ka thënë se janë afro 81 mijë punëtorë që me padurim po presin rritjen e pagës minimale.
“80.985 persona paguhen më pak se 264 euro në muaj. Janë punëtorët e mirëmbajtjes, sigurimit fizik, arkëtarë, ndërtimtarë e shumë të tjerë që me padurim presin rritjen e pagës minimale. Por, ata që për më shumë se një dekadë e lanë pagën minimale në 130/170 euro, sot e paskan dërguar në Gjykatë Kushtetuese Ligjin për Pagën Minimale, për ta kundërshtuar rritjen që ka propozuar Qeveria Kurti. Pra lëre që ata vetë nuk e rritën pagën minimale sa ishin në pushtet, por tash kur ne e rritëm, po tentojnë që me çdo kusht ta bllokojnë. Pse vallë kanë kaq shumë urrejtje?!”, ka shkruar Murati.
