Deputeti i Lëvizjes Vetëvendosje, Mefail Bajqinovci, ka kritikuar opozitën duke thënë se sa ishin në pushtet “kanë nënshkruar marrëveshje me të cilat kanë vënë themele për Asociacion, sa herë që janë ndje ngushtë e në rrezik për largim nga pushteti, sot, flasin se si asociacioni na qenka rrezik”.
Ai ka thënë se “çirren për antiamerikanizëm e fryhen plotë shpresë ‘mos Amerika po na rehaton në pushtet me vazhdu biznesin’ e në anën tjetër Senati përfshinë FSK-në si ushtri partnere për stërvitje e operacione të përbashkëta”.
Bajqinovci ka shtuar se kur e shohin se po u dështon kauza, sipas tij sajojnë filma “të lodhtë”.
“Kur e shohin që prapë e kanë bërë skllotë, fillojnë e mendojnë se çfarë reformash po i bën Qeveria me ligjet për reformat në drejtësi, pagën minimale, ligjin që i mbron qytetarët nga çmimet abuzive me barna dhe Kuvendi zgjedh bartës funksionesh publike të aftë, të pastër, të përkushtuar, çohen e planifikojnë diversion kushtetues kundër vendimeve të mazhorancës që kanë në qendër mirëqenien ekonomike e sociale të çdo qytetari. Pra, një destruksion antishtetëror malinj i një kaste që shpresën e vetme e ka tashmë në metodën e diversionit me institucione të kapura. Nuk mundeni. Mund të na vononi vetëm pak kohë. Me na ndalë asnjëherë. E ndërkohë, këto lojëra të ulëta qytetari po i sheh, kupton dhe natyrisht se do të ua tregojë vendin. Kanë me ju rrasë zgjedhje, në orarin e rregullt kushtetues”, ka shkruar ai në Facebook.
