Lista Serbe ka njoftuar se përfaqësuesit e saj, Igor Simiq dhe Slavko Simiq, janë takuar të enjten me Zëvendësndihmës Sekretarin dhe Përfaqësuesin Special të Shteteve të Bashkuara për Ballkanin Perëndimor, Gabriel Escobar.
Në njoftimin e Listës Serbe është bërë e ditur se ky takim është zhvilluar në Departamentin amerikan të Shtetit.
Aty thuhet se gjatë këtij takimi është diskutuar qëndrimi i komunitetit serb për situatën politike dhe të sigurisë në Kosovë, nevoja e respektimit të marrëveshjeve të nënshkruara, përfshirë edhe atë për formimin e Asociacionit të komunave me shumicë serbe, si dhe udhërrëfyesi për depërshkallëzim të situatës në veri të Kosovës.
Qeveria e Kosovës është pajtuar më 10 korrik që të bëjë një deklaratë publike, për të mbështetur mbajtjen e zgjedhjeve të parakohshme në katër komunat veriore, pas verës. Sipas marrëveshjes, Kosova përkushtohet të sigurojë bazën e nevojshme ligjore për të mundësuar organizimin e zgjedhjeve.
