Pas miratimit të Ligjit për skemat pensionale, kryeministri Albin Kurti ka premtuar reformë të plotë.
Nëpërmjet një postimi në Facebook, Kurti ka thënë se Qeveria mbetet e përkushtuar për krijimin e një sistemi pensional të barabartë për të gjithë dhe ngritje të mirëqenies sociale.
“Hapi tjetër do të jetë reforma e plotë pensionale së bashku me reformën sociale, për të cilat kemi filluar punën. Shumë shpejt do t’i dërgojmë në Kuvend këto projektligje për të bërë ndryshimet e nevojshme ligjore”, ka shkruar ai.
Të enjten në mbrëmje, Kuvendi e ka miratuar projektligjin për ndryshimin dhe plotësimin e ligjit për skemat pensionale të financuara nga shteti, i cili do t’ua njohë mijëra qytetarëve të drejtën e pensionit kontributpagues.
Projektligj u miratua në lexim të dytë me 62 vota për, asnjë kundër dhe asnjë abstenim.
