Mrekullitë ekzistojnë por jo këtë herë. Tirana pësoi disfatë 3-1 ndaj Besiktas në “Vodafone Arena”, në sfidën e parë të turit të dytë të Conference League.
Në minutat e para bardheblutë provuan me kundërsulme për të vendosur në vështirësi skuadrën turke, por pa ia dalë dot. Të besuarit e Gunes morën epërsinë e takimit në minutën e 21-të, kur Masuku krosoi për Bulut, i cili u tregua i saktë para porte.
Besiktas shkoi në dhomat e zhveshjes me avantazhin e dyfishtë, pasi në fundin e fraksionit një e majtë e bukur e Mulekas shkoi pas shpinës së portierit Selmani.
Në pjesën e dytë vendasit rritën akoma më shumë presionin, në kërkim të golit të 3-të. Aboubakar provoi në minutën e 61-të, por Selmani priti goditjen qëndrore.
Tirana do futej sërish në lojë në minutën e 83-të, falë Kainas, i cili ngushtoi shifrat. Debutim fantastik në ndeshje zyrtare i sulmuesit brazilian, duke shënuar një gol me mjaft vlerë.
Semih Kilicsoy thelloi shifrat me golin e tij në fund. Kualifikimi do të vendoset pas një jave, në Shqipëri.
