Memli Krasniqi, Kryetari i Partisë Demokratike të Kosovës, përmes një postimi në facebook ka reaguar pas deklarimit të ministres së Arsimit, Shkencës, Teknologjisë dhe Inovacionit, Arbërie Nagavci, duke thënë se po e shqyrtojnë mundësinë që t’i transferojnë mjetet financiare te prindërit dhe ata t’i blejnë tekstet shkollore për fëmijët e tyre.
Sipas z. Krasniqi, “përveç rritjes së kostos së jetesës, përmes rritjes së çmimit të energjisë e produkteve bazike ushqimore, papunësisë e korrupsionit masiv, prindërit e rënduar ekonomikisht nga keqqeverisja e këtij pushteti duhet që të blejnë edhe librat për fëmijët e tyre”.
Ai ka thënë se çështja e teksteve shkollore ishte zgjidhur në kohën kur kryeministër ishte Hashim Thaçi, duke siguruar libra falas.
“Mbi 300 mijë familje kosovare do të detyrohen t’i blejnë librat për fëmijët e tyre – të pasigurt nëse ndonjëherë do t’u rimbursohen ato të holla. Këtë çështje e kishte zgjidhur rreth 15 vite më parë ish-kryeministri Hashim Thaçi, duke u lehtësuar sadopak barrën e shkollimit të fëmijëve prindërve kosovarë, përmes sigurimit të librave falas”, ka shkruar ai.
“Me këtë lloj qeverisje, Albin Kurti vetëm sa po kontribuon në thellimin e varfërisë së qytetarëve dhe rritjes së numrit të emigrantëve kosovarë”, ka thënë kryetari i PDK-së Memli Krasniqi.
Kujtojmë se në një konferencë për media, ministrja Arbërie Nagavci ka thënë se po e shqyrtojnë mundësinë që t’i transferojë mjetet financiare në xhirollogaritë e prindërve dhe ata t’i blejnë vet tekstet shkollore për fëmijët e tyre.
