Milorad Dodik thotë se përfaqësuesit nga Republika Srpska do t’i dërgojnë një propozim qeverisë boshnjake “në ditët në vijim”.
Udhëheqësi serb i Bosnjës Milorad Dodik ka thënë se Bosnja dhe Hercegovina duhet të aplikojë për t’u bashkuar me grupin BRICS si një alternativë ndaj Bashkimit Evropian.
“Duke pasur parasysh se kushte të reja dhe të paqarta për pranim në Bashkimin Evropian po dalin gjithmonë nga Brukseli, unë besoj se Bosnja dhe Hercegovina duhet të paraqesë një kërkesë për anëtarësim në BRICS,” shkroi ai në X, i njohur më parë si Twitter. “Unë besoj se aty do të pranohet para BE-së”.
Dodik – anëtari serb i organit presidencial prej tre personash që qeverisë Bosnjën – tha se përfaqësuesit nga Republika Srpska do t’i dërgojnë një propozim qeverisë boshnjake “në ditët në vijim”, duke i kërkuar atyre që të marrin në konsideratë këtë plan.
Dodik, kreu i entitetit me shumicë serbe të Republikës Srpska, një nga dy njësitë administrative në Bosnje dhe Hercegovinë, ka pasur një marrëdhënie të trazuar me BE-në për vite me rradhë. Ai ka shprehur vazhdimisht retorikë secesioniste, ka nxitur ndjenjat nacionaliste dhe ka kërcënuar të krijojë një ushtri të shkëputur serbe.
Ai aktualisht është nën sanksionet e SHBA-së për minimin e institucioneve të Bosnjës dhe kërcënimin e integritetit territorial të vendit.
Edhe në mes të pushtimit rus të Ukrainës, Dodik ka mbajtur një marrëdhënie të ngushtë me Kremlinin. Në janar, ai i dha Presidentit të Rusisë Vladimir Putin nderin më të lartë të njësisë që ai drejton, një veprim që u kritikua nga zyrtarët e BE-së dhe SHBA-së. Komisioni Evropian i kujtoi menjëherë Dodikut rëndësinë e sundimit të ligjit ndërsa vendi ndjek anëtarësimin në BE, veçanërisht pasi Bosnja fitoi statusin e kandidatit për në BE dhjetorin e kaluar.
Grupi në zhvillim i BRICS – i përbërë nga Brazili, Rusia, India, Kina dhe Afrika e Jugut – ka rënë dakord së fundmi të ftojë gjashtë vende të tjera për t’u bashkuar me aleancën e tyre. (Burimi: Politico)
