Deputeti i PDK-së, Bekim Haxhiu ka kritikuar drejtuesin e OVL-UÇK-së Faton Kinaku për deklaratën e tij “më parë e vras Kurtin, se që largohem nga Kosova”.
“Faton Klinaku me deklaratën e tij është treguar i pamatur pikërisht duke i shkuar për shtati LVV-së e cila që nga themelimi nxitë vazhdimisht vlla-vrasje, përçarje e shkatërrimin e shtetit”, ka shkruar Haxhiu në Facebook.
Deputeti opozitar thotë se Klinaku me këtë deklaratë “zgjoi” LVV-në që sipas tij ishin të heshtur prej muajsh për shkak të skandaleve.
“Klinaku i paska zgjua nga gjumi LVV- në se ka disa muaj janë heshtur e besa as statusa nuk kishin fytyrë me postua në rrjete sociale, nga skandalet e çdoditshme të Qeverisë”.
Haxhiu thotë se LVV-së deri më tani nuk u kanë penguar skandalet e shumta e “që tash po u pengoka deklarata e Klinakut”.
“LVV-së nuk i ka penguar as vjedhja e rrymës, as vjedhja e grurit, vajit, sheqerit, as arrestimi i sekserit Ridit e dilerit të drogës asambleistit të LVV-së Mujecit”.
“E tash po u pengojka deklarata e Faton Klinakut, po kanë harru që pikërisht VV-ja me eksponentët e saj bënin thirrje çdo ditë për vrasjen e Hashim Thaçit e Kadri Veselit”.
“Pse LVV-ja nuk përgjigjet cilin politikan te PDK-se ka pasë dëshirë Albin Kurti ta vriste përmes sekserit të tij Ridit? Shumë bre hipokrita!!!”, ka shkruar tutje Haxhiu.
Edhe këshilltari i kryeministrit Albin Kurti, për çështjen e kategorive të dala nga lufta, Aziz Bici, ka reaguar pasi ushtruesi i detyrës së kryetarit të OVL të UÇK, Faton Klinaku, ka kërcënuar me jetë Kurtin.
Bici, përmes një postimi në Facebook, ka thënë se po bëhet hera e dytë që brenda rreth një muaji Kryeministri i Republikës së Kosovës po kërcënohet publikisht, dhe në të dy rastet ato kërcënime vijnë nga njerëz që po flasin në emër të veteranëve të luftës dhe që përfaqësojnë ata.
