Prokuroria Speciale e ka konfirmuar se sot është intervistuar ushtruesi i detyrës së kryetarit të OVL-UÇK-së, Faton Klinaku, lidhur me postimin e mbrëmshëm në Facebook, ku shkroi se “më parë e vras Albin Kurtin sesa që ia lëshoj rrugën e iku nga Kosova”.
Zëdhënësi i Prokurorisë Speciale, Ekrem Lutfiu, i ka thënë Gazetës Express se Klinaku dyshohet për veprën penale “‘’Dhuna ndaj përfaqësuesve të lartë të Republikës së Kosovës’’.
Pas intervistimit, Lutfiu thotë se Klinaku është liruar në procedurë të rregullt.
“Ju njoftojmë se me urdhër të Prokurorisë Speciale, Policia e Kosovës, ka intervistuar sot, personin me inicialet, F.K, për shkak të dyshimit të arsyeshëm se i njëjti ka kryer veprën penale ‘’Dhuna ndaj përfaqësuesve të lartë të Republikës së Kosovës’’.I njëjti pas intervistimit është lëshuar në procedurë të rregullt”, ka deklaruar Lutfiu.
Sipas Kodit Penal të Republikës së Kosovës, saktësisht Nenit 128, kryerja e kësaj vepre dënohet me burgim nga tre deri në dhjetë vjet.
“Kushdo që me qëllim të rrezikimit të rendit kushtetues apo sigurisë së Republikës së Kosovës, me përdorim të dhunës apo me kanosje të dhunës, pengon një apo më shumë nga personat e saktësuar në nenin 126 të këtij Kodi në ushtrimin e detyrave zyrtare apo i detyron të kryejnë apo të mos kryejnë ndonjë veprim nga fushëveprimi i detyrave të tyre, dënohet me burgim prej tre (3) deri në dhjetë (10) vjet”, parashihet me Kodin Penal
