Arben Gashi, Shef i Grupit Parlamentar të LDK-së, ka paralajmëruar kallëzim penal ndaj ministres së Arsimit, Arbërie Nagavci, lidhur me vendimin për subvencionim të teksteve shkollore.
Gashi ka folur para medieve duke thënë se vendimi i MASHTIT është anti-ligjor, ndërsa për qeverinë ka thënë se është e paaftë për menaxhim me tekste shkollore. Gashi shtoi se ky “keqmenaxhim” u ka shkaktuar dëme ekonomike e emocionale prindërve.
“Ata u sollën në mënyrë jo institucionale, duke pamundësuar Kuvendit që të shohë se ku janë problemet në lidhje me librat dhe cilat janë veprimet dhe mos veprimit që i ka bërë Qeveria”.
“Qeveria është në shkelje të ligjit për tekste shkollore dhe në shkelje të ligjit parauniversitar. Kjo është një shkelje shumë e rëndë që Ministria po e bënë dhe për këtë do të përballen sipas gjitha gjasave edhe me ndjekje penale ministrja e Arsimit”.
Ndër të tjera Gashi ka folur edhe për pasojat e vendimit të ministres Nagavci duke thënë se “paaftësia e qeverisë për të menaxhuar këtë proces ka shkaktuar një dëm të madh ekonomik dhe dëm emocional për prindërit dhe nxënësit i cili është dëm pa riparueshëm”.
Kujtojmë se ministrja e Arsimit, Arbërie Nagavci është deklaruar disa herë mbi procesin e pajisjes me tekste shkollore me vendim të ri, për nxënësit që nisin vitin e ri shkollor duke dhënë arsyetimet e veta.
MASHTI ka ndarë nga 80 euro për nxënësit nga klasa e parë deri në të pestën dhe nga 30 euro për ata nga e gjashta deri në të nëntën, pasi të fundit i kanë të siguruara librat nga viti i kaluar.
Për subvencionim të teksteve dhe materialeve tjera të nevojshme, Qeveria e Kosovës javën e kaluar ka ndarë rreth 13 milionë euro. Numri i nxënësve nga klasa e parë deri në të nëntën në Kosovë llogaritet të jetë 213.000.
