Ish-ministri i Punëve të Brendshme, Bejtush Gashi, ka thënë se rreziku i largimit të zyrtarëve policorë nga Policia e Kosovës është i lartë nëse Qeveria nuk ka interesim për kërkesat e tyre.
Të mërkurën në “Interaktiv” të KTV-së, Gashi ka bërë të ditur se vetëm gjatë këtij viti, rreth 50 policë e kanë lëshuar vullnetarisht institucionin.
Ai ka thënë se Ministria e Punëve të Brendshme do të duhej të merrej më seriozisht me sfidat dhe problemet me të cilat përballen pjesëtarët e PK-së tash e 24 vjet.
“Përkundër kërkesave të Policisë së Kosovës që kanë ardhur në mënyrë të drejtpërdrejt, Qeveria nuk ka arritur ta gjejë një zgjidhje edhe në vitin 2023. 24-vjetori Policinë e gjen pa sigurim shëndetësor, pa sigurim të jetës dhe me probleme të tjera shtesë sfiduese. Jetojmë në një kohë relativisht të lartë të inflacionit dhe kërkesa është që zyrtarëve policorë t’u rritet rroga, t’u krijohen kushte infrastrukturore për të operuar, megjithatë ky institucion ka sfida dhe probleme me të cilat Ministria do të duhej të merrej më seriozisht. 50 policë në këtë vit e kanë lëshuar vullnetarisht Policinë e Kosovës. Nëse Qeveria s’ka interesim për kërkesat e policëve, rreziku i largimit të tyre është i lartë”, ka thënë ai.
Në ditën kur u shënua 24-vjetori i themelimit të Policisë së Kosovës, Gashi ka thënë se nuk do të duhej të ekspozohej armatimi i saj, siç u bë në manifestimin e së mërkurës.
“Kam pritur që në këtë ditë të ketë organizime dhe aktivitete që lidhen me bashkëpunimin e Policisë me qytetarët, edhe pse ishin hapur stacionet për vizita të qytetarëve, por të ketë edhe organizime të tjera që lidhen me familjarizimin e zyrtarëve policorë me qytetarët si aktivitetet sportive, por jo edhe ekspozimi i armatimit. Ky ekspozim sinjalizon filozofinë e policimit të mbështetur në forcë. Sipas mendimit tim është dashur ta organizojnë ndryshe, të ndahen mirënjohje dhe dekorata për të gjithë ata që në punën dhe angazhimin e tyre kanë dhënë rezultate. Ekspozimi armatim i targetohet institucionit militar, përkatësisht ushtrisë”, është shprehur ai.
Në bazë të matjeve, Gashi ka thënë se sa i përket reagimit PK-ja qëndron mirë në raport me rajonin.
