Vëllait të Salih Mustafës (Calit), Arben Mustafës i është konfiskuar telefoni me urdhër të Prokurorisë së Dhomave të Specializuara të Kosovës në Hagë. Kjo është bërë nga ana e zyrtarëve të EULEX-it.
Lajmin e ka konfirmuar avokati i Mustafës, Betim Shala.
“Po është e vërtetë. Ka ndodhur sot rreth orës 16:00. Telefonin e ka konfiskuar policia e EULEX-it. Kjo është bërë me vendim të gjyqtarit të Gjykatës së Dhomave të Specializuara në Hagë”.
Sipas tij, “ekziston dyshimi i kryerjes së veprës penale “pengim i drejtësisë”. Për momentin vetëm ky hap procedural është marrë, pra konfiskimi i telefonit”.
Gjykata Speciale e ka shpallur fajtor dhe ka dënuar Salih Mustafën me 26 vite burgim për krime lufte.
