Projektligji për Kodin Civil, specifikisht pjesa për regjistrimin civil në mes të personave të gjinisë së njëjtë, ka shfaqur vazhdimisht polemika te deputetët e Kuvendit të Kosovës.
Rrahmani tha se projektligji për Kodin Civil nuk mund të kalojë këtë mandat, madje nuk do të sillet fare në Kuvend.
“E drejta mundet me u votu prej atyre që e kanë agjendë, në këtë pikë kam pasur deklaratë para se të bëhem deputet, kam qenë konstant kundër. Edhe sikur opozita ta mbështesë, nuk kalon ky ligj, edhe nuk vjen hiç në Kuvend këtë mandat sepse nuk ka vota”, tha Rrahmani në Debat Plus, teksa debatoi me Imer Mushkolajn.
“A po gëzohesh ti?”, ishte pyetja e menjëhershme e Mushkolajt drejtuar Rrahmanit.
“Natyrisht”, u përgjigj deputeti Rrahmani.
“Shqetësuese, një deputet shfaq hare dhe gëzim që një ligj nuk vjen në Kuvend”, vazhdoi të thotë Mushkolaj.
Sipas Rrahmanit, rreth 80% e deputetëve të Kuvendit të Kosovës janë me bindje kundër këtij neni të kodit civil.
“Për shkak nuk ka, me bindje janë me 80% të deputetëve kundër, nuk e kanë vullnet këtë çështje, e votojnë për shkak të kërkesave të Qeverisë dhe mënyrës se si e shohin, por bindjet janë se 80% të deputetëve kanë bindje tjetër. AAK publikisht është kundër Kodit Civil për martesat e gjinisë së njëjtë”, tha ai.
