Kryeministri i Kosovës, Albin Kurti, të shtunën ka njoftuar se gjatë vizitës që po zhvillon në Zvicër, ka marrë pjesë në një organizim të Partisë Socialdemokrate në prag të zgjedhjeve atje.
Ai ka thënë se së bashku me deputetin zviceran, Cedric Wermuth, ka diskutuar me diasporën kosovare.
Kurti ka falënderuar deputetin Wermuth, që i ka dhënë mundësinë që t’i drejtohet diasporës kosovare në Zvicër.
“Faleminderit Cedric Wermuth, bashkëkryetar i Partisë Socialdemokrate, për mundësinë për të folur me diasporën tonë”, është shprehur kreu i ekzekutivit.
Ai tutje ka thënë se me diasporën ka diskutuar për “progresin e Kosovës si dhe reformat që e bëjnë atë më të barabartë dhe tërheqëse për investime”.
“Diskutova për progresin Kosovës në fusha të tilla si ndihma për nënat e reja, bursat e studentëve dhe mbrojtja e tokës, reformat që e bëjnë atë më të barabartë dhe tërheqëse për investime”, ka shkruar Kurti në platformën “X”.
Ndryshe, kryeministri Kurti ditë më parë është kritikuar se po ndërhynë në zgjedhjet e Zvicrës.
Kryetari i Degës së PDK-së në Zvicër, Ragip Xhaka, ka thënë se shqiptarët në Zvicër, përmes punës, kontributit dhe qytetarisë së tyre, ka vite që janë pjesë e rëndësishme dhe përbërëse e këtij shteti.
“Përfshirja e partive politike të Kosovës në zgjedhjet zvicerane, në rastin konkret e Kryeministrit të Kosovës, nuk i shërben kësaj harmonie. Në fakt, kjo ndërhyrje mund të jetë vetëm e dëmshme, duke hutuar mërgatën dhe përçarë opinionin”, ka deklaruar ai.
