Sulmi i fundit i Hamasit ndaj Izraelit u orkestrua nga një figurë misterioze e quajtur Mohammed Deif – padiskutim një nga komandantët më të dekoruar të rezistencës palestineze – i cili u ka mbijetuar shtatë tentativave për vrasje dhe ka fituar krahasime me Osama Bin Laden.
Mohammed Deif ka mbajtur titullin e Njeriut më të Kërkuar të Izraelit për dekada me radhë, me tentativa të shumta për jetën e tij, që rezultuan në humbjen e të dy duarve, këmbëve dhe syrit, duke e lënë atë të varur përgjithmonë në një karrige me rrota.
Për t’i shpëtuar kapjes, Deif kërkon strehim në rrjetin e ndërlikuar të tuneleve nëntokësore të Gazës, një sistem që ai ndihmoi në hartimin e tij, ose zhvendoset në disa shtëpi të sigurta çdo natë.
Çuditërisht, ekziston vetëm një fotografi e njohur e tij.
I lindur në një kamp refugjatësh, ai ndryshoi emrin e tij nga Mohammed Diab Ibrahim al-Masri në Deif, që do të thotë “Mysafiri” në arabisht, duke pasqyruar lëvizjen e tij të vazhdueshme nga një shtëpi në tjetrën. I lindur në Gaza në vitin 1965, ai është komandanti i krahut ushtarak të Hamasit, Brigadave al-Qassam.
Gjatë sulmit të fundit, ai publikoi një regjistrim teksa luftëtarët e tij depërtuan në Izrael, me qëllim të vrasjes ose rrëmbimit të burrave, grave dhe fëmijëve.
Mesazhi i Deif u kërkoi palestinezëve “të dëbojnë pushtuesit dhe të rrënojnë muret” dhe u bëri thirrje simpatizantëve nga kombet e tjera që t’i bashkohen luftës, duke ngritur shqetësime për një kryengritje të mundshme shumëkombëshe.
Mkhaimar Abusada, një profesor i politikës në Universitetin Al-Azhar të Gazës, parashikon se Deif do të bëhet “si një zot për të rinjtë” pas këtij sulmi, duke tërhequr një paralele rrëqethëse me Osama Bin Ladenin si një “kryevrasës”./GeoNews
