Mbështetja e re ushtarake e Shtëpisë së Bardhë për Izraelin ka nxitur takimet urgjente nëpër kryeqytetet evropiane, për të dhënë një përgjigje të BE-së ndaj krizës mbi konfliktin izraelito-palestinez.
Sulmet e papritura të Hamasit ndaj Izraelit gjatë fundjavës kanë çuar në betimin e qeverisë izraelite për hakmarrje totale në Rripin e Gazës, me një numër rekord prej 300,000 rezervistësh të përgatitur tashmë brenda 48 orëve.
Kjo situatë paraqet një shqetësim për ukrainasit, të cilët presin të marrin mbështetjen e mëtejshme nga vendet e NATO-s në takimin e parë të ministrave të mbrojtjes pas samitit të liderëve të NATO-s që u mbajt në muajin korrik, ku janë dhënë premtime të forta për sigurinë dhe mbështetjen ushtarake të Ukrainës.
Oleksandr Merezhko, kryetar i komisionit të parlamentit ukrainas për politikën e jashtme, pranoi “frikën” e tij nëse Perëndimi mund të qëndrojë ende i fokusuar në pushtimin e Rusisë, ndërkohë që tani po merret edhe me situatën e vazhdueshme izraelite-Hamas.
“Unë mund të flas vetëm për veten time. Po, ka frikë të tilla,” tha Merezhko për POLITICO. Por, në të njëjtën kohë, mendoj se në fund nuk do të jetë problem, sepse SHBA-të janë një vend kaq i fuqishëm në aspektin ekonomik dhe ushtarak”.
Përderisa është planifikuar që në këtë takim, ministri i ri i mbrojtjes i Ukrainës, Rustem Umerov të marrë gjithë vëmendjen, prap se prap, pritet që aty të diskutohet edhe për Izraelin – të paktën në mënyrë periferike.
“Unë do të habitesha nëse situata në Lindjen e Mesme nuk do të përmendet në takim,” tha një diplomat i NATO-s, i cili dha anonimitetin për të folur lirshëm. Një diplomat i dytë tha se ata prisnin interes të fortë për atë që Sekretari i Mbrojtjes i SHBA Lloyd Austin ka për të thënë.
Vetëm një javë përpara sulmit të Hamasit, admirali holandez Rob Bauer, kryetar i Komitetit Ushtarak të NATO-s, pati vizituar Izraelin për t’u takuar me Presidentin Isaac Herzog dhe zyrtarë ushtarakë. Bauer vizitoi gjithashtu pikën kufitare të Gazës, ku vlerësoi “ekspertizën unike të ushtrisë izraelite në veprimtarinë e nëndheshme kundër terrorizmit”.
