“Fitoret e Juventusit janë 38 sepse ne luftuam çdo ditë duke dëshmuar se ishim më të fortët në Itali. Nuk janë 37 skudeto, janë 38”.
Keshtu tha Zlatan Ibrahimovic nga skena e Festivalit Sportiv të Trentos, duke kujtuar periudhën e tij me Juventusin.
Ibra ka veshur fanellën e Juventusit nga viti 2004 deri në vitin 2006, duke fituar 2 kampionate të anuluara nga proceset sportive të lidhura me Calciopoli.
“Në Itali e nisa me Juventusin e Fabio Capello-s. Ai më tha se do të nxirrte të gjithë Ajax-in që kisha brenda meje. Ai donte më shumë konkretizim nga unë dhe që nga ajo ditë, cdo dite kemi punuar me Italo Galbiatin me goditje në portë. Capello tha se teknika ime ishte më e mirë se Van Basten, por nuk i kisha lëvizjet e tij. Prandaj kemi punuar në këtë aspekt”, thotë Ibrahimovic.
E ardhmja me Milanin?
Suedezi e mbylli karrierën e tij me Milanin, ku tani mund të rikthehet në një rol të ri. “Nuk kam plane dhe po i bëj gjërat për veten time. Nuk dua të jem simbol i së shkuarës, por të shohim se çfarë do të ndodhë, kam pasur disa takime me Milanin dhe po flasim”, thotë ish-sulmuesi.
Tonali dhe bastet
Në Milano, Ibra ndau dhomën e zhveshjes me Sandro Tonalin. Mesfushori, tashmë te Newcastle, është një nga lojtarët e përfshirë në hetimin e basteve të paligjshme. Nëse Tonali vuan vërtet nga varësia ndaj lojërave të fatit “duhet ta ndihmojmë sepse është si drogë. Kam luajtur edhe në kazino sepse secili bën çfarë të dojë me paratë e tij. Por ne duhet të kuptojmë situatën”, thotë suedezi. “Unë di pak për këtë histori, nuk kisha vënë re kurrë ndonjë gjë të çuditshme tek ai. Por nuk duhet të gjykoni para se të dini gjithçka”.
Krahasimi Balotelli – Leao
“Kur një fëmijë ka mundësinë të shfrytëzojë talentin e tij për të krijuar të ardhmen dhe humbet mundësitë, është mëkat. Balotelli kishte shumë dhe i humbi të gjitha. Kjo është e vërteta”, thotë Ibra.
“Rafa Leao nuk është Balotelli, ajo taka e pasme disa ndeshje më parë është diçka e shkëlqyer. Nëse shënon kështu, je një gjeni. Dhe kjo gjë të bën të kuptosh pse Leao është atje dhe Balotelli është në tribunë”.
