Shkolla e mesme dhe liceu “Gambetta” në Arras, në veri të Francës, u evakuuan pak pas orës 10 të mëngjesit të sotëm, e hënë 16 tetor, për shkak të një alarmi për bombë. Në vend mbërritën skuadrat EOD për të kontrolluar praninë e mundshme të eksplozivëve.
Kjo është e njëjta shkollë ku mësuesi francez Dominique Bernard u vra në një sulm të shtunën e kaluar.
Sot në vendngjarje kanë ndërhyrë disa ekipe për asgjësimin e bombave për të kontrolluar praninë e mundshme të eksplozivit. Kësaj iu shtuan edhe kontrollet e çantave të të rriturve dhe nxënësve të pranishëm.
Sipas BfmTv, alarmi u shkaktua nga një kërcënim që u shfaq në faqen e stacionit të policisë lokale. Në përgjithësi, rreth njëqind njerëz u evakuuan nga ndërtesat, duke përfshirë studentët dhe stafin e shkollës.
Sipas raportimeve të mediave franceze, operacioni u zhvillua në një situatë qetësie relative, ndërsa tavolina e mbështetjes psikologjike për studentët e vënë në funksion pas sulmit të javës së kaluar, mbetet në funksion.
Ditët e fundit, alarmi për terrorizëm është ngritur në nivelin më të lartë në Francë.
Gjatë fundjavës, Luvri në Paris dhe Pallati i Versajës u evakuuan gjithashtu për shkak të frikës nga bombat.
