Që nga janari deri në shtator, Policia e Kosovës ka arrestuar nëntë të dyshuar për veprën penale “Krime lufte kundër popullsisë civile”. Për të njëjtën vepër, në institucionet korrektuese janë 7 të dënuar dhe 15 të burgosur. Me këto raste, që nga viti 2019 merret Gjykata Themelore në Prishtinë, mirëpo nga kjo gjykatë nuk kanë kthyer përgjigje se sa është numri i personave që po gjykohen për krime lufte.
Që nga përfundimi i luftës së fundit nuk është që ka pasur shumë aktivitet sa i përket gjykimit të krimeve që janë kryer në Kosovë. Këtë e dëshmon edhe numri i personave që po vuajnë dënimin në institucionet korrektuese.
Nga Shërbimi Korrektues i Kosovës kanë thënë se aktualisht janë 22 të burgosur në institucionet korrektuese, prej tyre vetëm 7 janë të dënuar.
“Aktualisht për veprën penale “Krime Lufte kundër Popullatës Civile” në institucione korrektuese janë 22 të burgosur, prej tyre 7 janë të dënuar dhe 15 janë të paraburgosur”, kanë thënë nga SHKK.
Ndërkaq gjatë periudhës 1 janar- 30 shtator, Policia e Kosovës ka arrestuar nëntë të dyshuar për veprën penale “Krime lufte kundër popullsisë civile”.
“Lidhur me kërkesën e poshtëshënuar ju njoftoj se gjatë periudhës nga Janari deri 30 Shtator 2023 për veprën penale “Krime Lufte Kundër Popullsisë Civile” janë arrestuar nëntë (09) persona të dyshuar”, thuhet në përgjigjen e Policisë për Express.
Që nga viti 2019 rastet për veprën penale “Krime lufte” janë kompetencë e departamentit special të Gjykatës Themelore në Prishtinë, mirëpo nga kjo gjykatë nuk kanë kthyer përgjigje që nga java e kaluar. Për dallim prej Prishtinës, përgjigje ka kthyer Themelorja në Prizren, Mitrovicë, Ferizaj dhe Gjakovë.
Nga Gjykata Themelore në Prizren i kanë thënë Gazetës Express se më 27 qershor të këtij kanë shpallur aktgjykim dënues për vetëm një rast që e kanë pasur përsipër.
“Gjykata Themelore në Prizren me datë 27.06.2023, ka shpallur Aktgjykim dënues për një rast të vetëm që ka qenë në gjykim pranë Gjykatës Themelore në Prizren për veprën penale krime lufte. Ndërsa bazuar në kopetencat sipas Ligjit për Gjykata që nga vitit 2019, , rastet për vepra penale Krime Lufte, tashmë trajtohen nga Prokuroria Specila, ashtu që këto lëndë bien në kompetencë të departamentit Special të Gjykatës Themelore Prishtinë.”
Ndërsa, në Gjykatën Themelore në Mitrovicë janë pesë lënde për krime lufte, për njërin është lëshuar urdhërarrest ndërkombëtar.
“Në lidhje me kërkesën tuaj sa i përket personave që janë duke u gjykuar për veprën penale: Krime Lufte. Sipas informacineve të marra nga gjyqtarët e Gjykatës Themelore Mitrovicë- Departamenti Për Krime të Rënda, gjithësej janë pesë lëndë, pra pesë të pandehur të akuzuar për Krime Lufte. Ku njërit nga këta të pandehur i është lëshuar Urdhërarrest Ndërkombëtar nga kjo Gjykatë”, thuhet në përgjigjen e Gjykatës për Express.
Ndërsa nga Gjykata në Gjakovë dhe ajo në Ferizaj kanë thënë se nuk kanë lëndë për krime lufte, pasi këto raste janë kompetencë e Gjykatës Themelore në Prishtinë.
“Ju njoftoj se veprat penale për krime lufte, janë kompetencë lëndore e Gjykata Themelore në Prishtinë dhe trajtohen nga Departamenti Special”, thuhet në përgjigjen e Gjykatës në Gjakovë.
“Ju njoftojmë se në Gjykatën Themelore në Ferizaj nuk kemi raste për krime lufte. Njëherit, ju njoftoj se këto raste janë kompetencë e Gjykatës Themelore në Prishtinë – Departamenti Special”, thuhet në përgjigjen e Gjykatës në Ferizaj.
Bekim Blakaj nga Fondi për të Drejtën Humanitare, dje i tha EO’së se deri tash Prokuroria Speciale ka ngritur gjashtë aktakuza.
“Nëse nuk gaboj deri më tani janë të dorëzuar gjashtë aktakuza nga Prokuroria Speciale e Kosovës në atë Dhomën Speciale pranë Gjykatës Themelore në Prishtinë, pra gjashtë aktakuza nëse nuk gaboj bëhet fjalë për gjashtë persona. Ne nuk e dimë saktësisht identitetin e tyre sepse ende janë me iniciale mirëpo po supozojmë që shumica dërrmuese prej tyre janë serbë”, tha ai.
Express ka dërguar pyetje në adresë të Prokurorisë Speciale, mirëpo nuk ka pranuar ende përgjigje.
Lidhur me arrestimet e fundit të serbëve nën dyshimin për “Krime lufte kundër popullsisë civile” janë deklaruar edhe nga Bashkimi Evropian para disa javësh.
Zëdhënësi i BE’së Peter Stano ka thënë se janë në kontakt me autoritetet në Prishtinë për të marrë të gjitha informacionet për arrestimet e fundit të serbëve në veri të Kosovës, nën akuzën e kryerjes së krimeve të luftës.
“Ne jemi duke e monitoruar situatën dhe jemi në kontakt të ngushtë me autoritetet në Kosovë, për të zbuluar gjithçka rreth zhvillimit të mëtutjeshëm të situatës dhe do të reagojmë nëse është e nevojshme”, tha zëdhënësi i BE-së, Peter Stano
Ai shtoi se BE-ja nuk e konteston të drejtën e Kosovës për të ndjekur penalisht krimet e luftës, por nuk ka komentuar më tej për rastin.
