Ministri i Administrimit të Pushtetit Lokal, Elbert Krasniqi, ka thënë se deri tash nuk ka pasur asnjë iniciativë për peticion për shkarkime kryetarësh në veri, por as në komunat tjera në Kosovë, që nga hyrja në fuqi në shtator e udhëzimit administrativ për peticione për shkarkime kryetarësh.
Në KTV, ai ka thënë se të gjithë kryetarët, si në veri, si në zonat tjera, “mbesin të plotfuqishëm në implementimin e mandatit të tyre kushtetues dhe ligjor”.
Krasniqi ka thënë se udhëzimi administrativ që tashmë ka hyrë në fuqi ka qenë “forma më e mirë për ta ruajtur demokracinë dhe për të garantuar siguri juridike për kryetarët e komunave”.
“Si qeveri jemi të përkushtuar në përmbushjen e të gjitha obligimeve që janë në tavolinën tonë dhe që duhet t’i përmbushim që të japim shembullin e mirë të kujdesit për secilin qytetar dhe proces. Si qeveri kemi iniciuar draftimin e udhëzimit administrativ. Ai është në fuqi dhe secili qytetar apo grup qytetarësh që dëshiron ta shfrytëzojë këtë mundësi ligjore për largimin e kryetarit nga zyra, kudo qoftë mund ta shfrytëzojnë. Deri tash s’ka informacion se ka inicim peticione për largim kryetarësh. Kryetarët në veri mbesin në detyrë, të plotfuqishëm në implementimin e mandatit të tyre kushtetues dhe ligjor”, ka thënë ai. “E kemi parasysh se zgjedhjet e fundit ishin me pjesëmarrje të vogël të qytetarëve, për arsye të njohura, që Serbia shantazhoi dhe frikësoi qytetarët serbë, por kryetarët janë rezultat i procesit demokratik dhe kushtetues. Largimi i tyre duhet të bëhet me mjete demokratike, kushtetuese dhe ligjore dhe peticioni është forma më e mirë për ta ruajtur demokracinë dhe për të garantuar siguri juridike për kryetarët”.
Ai ka thënë se nuk mund të konstatojë apo jo se a ka gatishmëri për zgjedhje të reja në veri. Megjithatë ka shtuar se përderisa në “Prishtinë ishim të përkushtuar për demokraci e me mjete demokratike Serbia shfrytëzoi kohën për të përgatitur sulm terrorist për ta aneksuar veriun”.
“Këto janë fakte, nga 24 shtatori e tutje asgjë s’është e njëjtë. Duhet të kemi parasysh që në situatën në të cilën jemi, ka një adresë që është fajtore kryesore për gjithë këtë situatë, nga 5 nëntori 2022 kur kryetarët e atëhershëm dhanë dorëheqje dhe policët e institucionet tjera, të gjitha kishin një plan të dedikuar për të zbehur autoritetin e Republikës të Kosovës në secilin cep të saj”, ka thënë ai.
Përmes këtij peticioni mundësohet që nëse mblidhen nënshkrimet e 20 për qind të qytetarëve me të drejtë vote, do të organizohet votimi për shkarkim të kryetarit, e që për të përfunduar me sukses duhet t’i marrë 50 për qind të votave të trupës votuese të asaj komune. Po që se në votim nuk arrihet kjo përqindje, organizimi i votimit s’mund të bëhet edhe të paktën një vit tjetër.
Kërkesa për zgjedhje të reja u shtua si presion nga ndërkombëtarët, pas tensioneve muaj më parë në veri, kur serbët lokalë protestuan duke kundërshtuar që kryetarët e rinj të ushtrojnë detyrat nga objektet komunale. Lista Serbe, si partia më e madhe e serbëve të Kosovës, ka kërkuar zgjedhje të reja, duke kushtëzuar me dorëheqjen e kryetarëve aktualë.
Krasniqi ka thënë se komunat në veri në vazhdimësi kanë pasur presion nga Beogradi e se politikanët lokalë serbë s’kanë guxuar të kenë takime publike me ministrat.
Ai ka thënë se ka pasur së fundmi takime edhe me kryetarët e komunave në veri si dhe se MAPL-ja ka kthyer ligjshmërinë për pranimin e katër komunave të veriut në Asociacionin e Komunave të Kosovës dhe se pritet vetëm votimi nga AKK-ja.
Ka thënë se nuk ka problem komunikimi me kryetarët e komunave.
Për Grantin e Katërt ai ka thënë se duhet të pritet regjistrimi i popullsisë.
Ministri po ashtu është shprehur se Qeveria po punon në ndërtimin e shtëpive për komunitetet në veri, përmes programeve të Ministrisë që ai udhëheq dhe asaj të Ambientit.
