Nga 1227 të anketuar, shumica dominuese prej mbi 80 për qind nuk i besojnë udhëheqjes së re të Listës Serbe. Ky është mendimi i shumicës së lexuesve të Kossev-it, të cilët janë shprehur në mënyrë përshkruese me qindra komente. “Nuk pyeten për asgjë, babi Millani është ende në krye”, është një nga mesazhet.
Pas dorëheqjes së Millan Radoiçiqit nga posti i nënkryetarit të kësaj partie, pasi ai mori përgjegjësinë për sulmin terrorist ndaj Policisë së Kosovës ku mbeti i vrarë një polic, si dhe së paku tre terroristë, Lista Serbe mori një pamje të re këtë javë.
Ish-drejtori i QKS të Mitrovicës së Veriur, Zllatan Ellek, është kryetari i ri i Listës Serbe, i cili e ka zëvendësuar Goran Rakiqin. Nënkryetarët e rinj janë: Dragisha Milloviq, Ivan Zaporozhac, Dallibor Jevtiq, pastaj Tanja Vujoviq dhe Dragana Antonijeviq, transmeton Paparaci.
Në publik dominojnë komentet kryesisht negative nga qytetarët të cilët nuk i shohin ndryshimet thelbësore të kësaj partie.
Nëpërmjet një sondazhi njëditor në rrjetet sociale, Kossev ka pyetur lexuesit e tij nëse udhëheqja e re u ngjall besim.
Janë marrë gjithsej 964 përgjigje në sondazhin në Instagram. Nga katër pyetjet, numri më i madh është shprehur negativisht në pyetjen nëse kanë besim te udhëheqja e re – 62% prej tyre, ose 602 lexues. Gjithashtu, 12% të tjerë ose 112 të anketuar deklaruan se aktualisht nuk kanë besim, por do të shohin nëse do të mbetet ashtu.
Besim kanë 16%, ose 116 nga ata që janë përgjigjur në këtë mënyrë. Gjithashtu 10% të tjerë – 94 prej tyre, aktualisht kanë besim, por do të shohin nëse do të qëndrojnë kështu.
Në dallim nga ky sondazh, vetëm dy përgjigje për të njëjtën pyetje u ofruan në Twitter. Nga 263 të anketuar, 91% nuk i besojnë Listës Serbe, dhe vetëm 9% besojnë.
Rezultatet nuk janë ndryshe as në Facebook, ku lexuesit e portalit u shprehën në mënyrë përshkruese. Ata kryesisht kritikojnë bindjen ndaj Millan Radoiçiqit dhe Aleksandar Vuçiqit dhe mungesën e luftës për interesat kombëtare të serbëve.
“Të njëjtët politikanë, njerëz të ndryshëm dhe vetëm një në krye, kështu që nuk ka asgjë çfarë të thuhet”.
“Ata nuk pyesin për asgjë. Millani është ende babai i tyre, ata ende nuk guxojnë as të urinojnë nga ai, ata ende do të hanë shuplaka nëse nuk i përmbushin detyrimet e tyre në terren”.
