Manchester City ka shënuar fitore të madhe në Ligën Premier pasi mposhti në udhëtim Manchester Unitedin me rezultat 3-0.
Mysafirët kaluan në epërsi në minutën e 26-të përmes Erling Haaland i cili shënoi nga pika e bardhë për 1-0 pas një faulli të shkaktuar në zonën e rrezikshme nga Rasmus Hojlund.
Vendasit patën dy raste të mira shënimi me Hojlund dhe McTominay por nuk ia dolën që të barazojnë shifrat, kjo edhe falë pritjeve fantastike të Ederson.
https://twitter.com/ManCity/status/1718664391380353395?ref_src=twsrc%5Etfw%7Ctwcamp%5Etweetembed%7Ctwterm%5E1718664391380353395%7Ctwgr%5E5d5ba054ea22eea7eccc7058ef5ac2c072dfc18f%7Ctwcon%5Es1_&ref_url=https%3A%2F%2Ftelegrafi.com%2Fmancesteri-vishet-ngjyre-te-kaltert-city-shkaterron-unitedin-ne-old-trafford%2F
Manchester City dyfishoi rezultatin në minutën e 49-të ku përsëri autor i golit ishte Haaland i cili kësaj radhe shfrytëzon për mrekulli një krosim të Bernardo Silvas për të shënuar me kokë për shifrat 2-0.
Goli që fundosi përfundimisht gjasat e Man United për rezultat pozitiv në këtë takim u shënua në minutën e 80-të nga Phil Foden.
Anglezi u gjend mjaft mirë në zonë kur Haaland bëri një pasim të bukur për të shënuar në portën e zbrazët për shifrat 3-0.
Deri në fund të ndeshjes City e menaxhoi mirë epërsinë e thellë të krijuar duke mbajtur posedimin e topit dhe duke mos lejuar që të rrezikohet porta.
Pas kësaj fitoreje City ‘rrëmben’ pozitën e tretë në Ligën Premier me 24 pikë të tubura, ndërsa United pëson humbjen e parë pas një serie prej tri ndeshjesh me fitore dhe renditet në pozitën e tetë me 15 pikë.
