Kryeministri i ri i Malit të Zi, Milojko Spajiq, në deklaratën e tij të parë pas zgjedhjes së qeverisë së re mëngjesin e sotëm, është pyetur se sa do të ketë ndikim Beogradi në punën e qeverisë së tij.
Dhe përgjigja e tij, sigurisht ka qenë një “dush i ftohtë” për nacionalistët serbë – pasi ai ka thënë se një ndikim i tillë do të jetë “zero”.
Sipas mediave në gjuhën serbe, ai gjithashtu është pyetur se sa ndikim ka pasur Beogradi në formimin e Qeverisë së Malit të Zi – për të cilën gjë ai është përgjigjur “njëjtë” – pra fare.
Ai tha gjithashtu se programi i reformës “Europe Tani 2”, i cili përfshin rritjen e pagës mesatare deri në 1000 euro, do të zbatohet plotësisht, siç ishte paralajmëruar në fushatën zgjedhore dhe “pa asnjë presje”.
Ai theksoi se mbështetja e 46 deputetëve për kabinetin e tij është më e larta që ka pasur deri më tani një qeveri në Mal të Zi.
Ndryshe, pas një diskutimi që zgjati gjithë natën – ndërmjet të hënës dhe të martës – deputetët e Kuvendit të Malit të Zi kanë votuar për qeverinë e 44-të të vendit.
Për Qeverinë kanë votuar 46 deputetë, kundër 19 dhe një abstenoi.
Me këtë, Spajiq edhe ka marrë mandatin e kryeministrit ndërsa sa i përket partive shqiptare, Nik Gjeloshaj është zëvendëskryeministër për Politikat Ekonomike dhe ministër i Zhvillimit Ekonomik, Fatmir Gjeka është ministër për të Drejtat e Njeriut dhe Minoriteteve dhe Marash Dukaj është ministër i Administratës Publike.
Në seancën e Kuvendit mori pjesë edhe presidenti i Malit të Zi, Jakov Milatoviq.
Ndërkohë të hënën, kryetari i Demokracisë së Re Serbe (NSD) dhe një nga liderët e koalicionit Për Ardhmërinë e Malit të Zi (ZBCG), Andrija Mandiq u zgjodh kryetar i Parlamentit të Malit të Zi.
