Gjashtë javë përpara se të vriste 18 persona në Lewiston, në Maine, policia e shtetit mori paralajmërime se Robert Card do të kryente një masakër, por nuk arriti të ndërhynte.
Kjo është bërë e ditur nga New York Times, duke cituar burime të zbatimit të ligjit.
Paralajmërimi për rezervistin ishte shumë më i qartë se sa zyrtarët e Maine e kanë pranuar publikisht pas sulmit të së mërkurës, të shtënat masive më vdekjeprurëse këtë vit në Shtetet e Bashkuara.
Sipas New York Times, në shtator Departamenti i Rezervistëve të Ushtrisë kontaktoi zyrën e sherifit duke raportuar se vrasësi ishte në kontrollin e deluzioneve paranojake, veçanërisht se ai pretendonte se ishte akuzuar nga shokët e tij ushtarë se ishte pedofil, duke goditur me grushta edhe njërin prej tyre.
Ushtria gjithashtu i tha sherifit se Card ishte shtruar në një spital psikiatrik të Nju Jorkut për dy javë në korrik.
Jo vetëm kaq, rreshteri i sherifit Aaron Skolfield kishte qenë në shtëpinë e vrasësit më 16 shtator duke u përpjekur të kontaktonte me të, por askush nuk u shfaq në derë, pavarësisht se ishte e qartë se dikush ishte në shtëpi.
Skolfield tha se ai kontaktoi gjithashtu vëllain e Card, i cili i tha atij se ai dhe babai i tij po përpiqeshin t’i merrnin armët e vëllait të tij. Rreshteri thuhet se i kërkoi Ryan Card të kontaktonte departamentin e sherifit nëse mendonte se vëllai i tij kishte nevojë për “një vlerësim”.
