Kryetari i Komunës së Pejës, Gazmend Muhaxheri, ka bërë të ditur me një postim në Facebook se në një ngjarje të rëndësishme në Kalabri të Italisë, është nënshkruar një marrëveshje e rëndësishme midis Provincës së Kozencës dhe Komunës së Pejës.
“Kjo marrëveshje, nënshkruar nga unë si Kryetar i Komunës së Pejës dhe Rossaria Succuro, si Presidente e Provincës së Kozencës, Kalabri, shënon një hap të rëndësishëm drejt zhvillimit të bashkëpunimit dhe shkëmbimit të vlerave tona.
Marrëveshja synon të zhvillojë dhe të forcojë lidhjet në fusha të ndryshme si kultura, turizmi, sporti dhe rinia. Në veçanti, synon të promovojë projekte të përbashkëta, duke vendosur theksin mbi vullnetarizmin si një mjet për përparimin e këtyre sektoreve.
Nënshkrimi i kësaj marrëveshjeje poashtu thekson rëndësinë e nismave që frymëzojnë arsimin, bashkëpunimin shkencor dhe teknologjik, si dhe ruajtjen e mjediseve kulturore dhe turistike.
Kjo përshkruan një hap të rëndësishëm drejt thellimit të lidhjeve të dy qyteteve tona, duke hapur rrugën për bashkëpunim më të madh dhe zhvillim të përbashkët në të ardhmen”. – ka shkruar kryetari Muhaxheri.
