Të paktën 119 persona kanë humbur jetën dhe 100 të tjerë janë plagosur pas një tërmeti të fortë në perëndim të Nepalit.
Tërmeti goditi në orën 23:47 (18:02 GMT) të premten rreth zonës perëndimore të Jajarkot, një zonë kodrinore rreth 500 kilometra (310 milje) në perëndim të kryeqytetit, Katmandu, ku jetojnë rreth 190,000 njerëz.
Shërbimi Gjeologjik i SHBA-së e vendosi magnitudën në 5.6 dhe tha se ishte vetëm 18 kilometra (11 milje) e thellë. Lëkundjet u ndjenë deri në Katmandu dhe madje rreth 600 km (375 milje) larg në kryeqytetin indian Nju Delhi.
“Numri i të vdekurve ka arritur në 119 dhe të paktën 100 janë plagosur,” tha zëdhënësi i policisë së provincës Karnali, Gopal Chandra Bhattarai, i cituar nga agjencia e lajmeve AFP.
Zyrtari lokal i Jajarkot, Harish Chandra Sharma tha se të paktën 34 njerëz ishin vrarë në rrethin e tij ndërsa në rrethin fqinj Rukum West, zyrtari i policisë Namaraj Bhattarai tha se të paktën 35 vdekje ishin raportuar.
Duke shkruar në platformën e mediave sociale X, kryeministri Nepalez Pushpa Kamal Dahal shprehu “dhimbjen e tij të thellë për dëmet njerëzore dhe fizike të shkaktuara nga tërmeti” dhe urdhëroi agjencitë e sigurisë të nisin operacionet e menjëhershme të shpëtimit dhe ndihmës.
Pamjet e mediave lokale treguan fasadat e shkatërruara të shtëpive me tulla, me pjesë të mëdha mobiljesh të shpërndara në tokë. Zyrtarët lokalë thonë se ende nuk ishte e mundur të vendoseshin kontakte me zonat afër epiqendrës në Ramidanda.
“Shtëpitë janë shembur. Njerëzit dolën me nxitim nga shtëpitë e tyre. Jam jashtë në turmën e banorëve të tmerruar. Ne po përpiqemi të gjejmë detaje të dëmeve”, tha zyrtari i policisë Santosh Rokka për agjencinë e lajmeve Reuters me telefon.
Të paktën 20 persona u dërguan me urgjencë në spital me lëndime, tha zyrtari i qarkut Jajarkot, Suresh Sunar për Reuters.
“Unë jam vetë në të hapur. Jemi duke mbledhur detaje, por për shkak të të ftohtit dhe natës është e vështirë të merret informacion nga zonat e thella”, tha ai.
Nepali shtrihet në një vijë të thyer gjeologjike, ku pllaka tektonike indiane shtyhet lart në pllakën euroaziatike, duke formuar Himalajet dhe tërmetet janë një dukuri e rregullt.
Në vitin 2015, rreth 9,000 njerëz u vranë në dy tërmete në Nepal. Qytete të tëra, tempuj shekullorë dhe vende të tjera historike u shndërruan në gërmadha, me më shumë se një milion shtëpi të shkatërruara.
