Sllobodan Prvanoviq, anëtar i Këshillit Mbikëqyrës të Parlamentit të Serbisë për fushatën zgjedhore, vlerësoi sot se “paraqitja” e presidentit të Serbisë, Aleksandar Vuçiq, në aeroportin ushtarak në Batajnicë, ku mori pjesë në prezantimin e armëve të reja të Forcave të Armatosura Serbe, nuk ishte asgjë tjetër veçse një fushatë burokratike.
Përmes një letre drejtuar anëtarëve të Bordit Mbikëqyrës, Prvanoviq ka kërkuar që organi të dënojë “keqpërdorimin e pozitës dhe shkeljen e ligjit nga Aleksandar Vuçiq”.
“Nuk ka dyshim se Aleksandar Vuçiq ka vepruar si president i Serbisë. Nuk ka dyshim se presidenti i Serbisë, Aleksandar Vuçiq, është angazhuar në agjitacion politik, dhe ai më i zakonshëm që mbështetet në ofendimin e kundërshtarëve politikë. “, tha Prvanoviq.
Ai po ashtu ka theksuar se presidentit të Serbisë i ndalohet me ligj që të angazhohet në agjitacion politik.
“Besoj se kjo paraqitje e presidentit të Serbisë, Aleksandar Vuçiq, është keqpërdorim i papranueshëm i pushtetit dhe mendoj se ne si Bord Mbikëqyrës duhet të reagojmë urgjentisht dhe ashpër”, tha Prvanoviq.
Ai ka kërkuar që Bordi Mbikëqyrës të lëshojë një deklaratë ku dënon sjelljen e tillë të Presidentit të Serbisë dhe i bën thirrje atij që në të ardhmen të përmbahet nga një sjellje e tillë.
Prvanoviq gjithashtu kërkoi që Prokurorisë Supreme Publike t’i dërgohet një letër me kërkesë për fillimin e procedurës për vërtetimin e përgjegjësisë penale të Presidentit të Serbisë, si dhe një letër Agjencisë për Parandalimin e Korrupsionit për fillimin e procedurës në përputhje me kompetencat e saj.
