Presidenti i Ukrainës, Volodymyr Zelensky, ka thënë se lufta me Rusinë është në fazë të re, teksa dimri pritet të komplikojë luftimet pas kundërofensivës së gjatë verore që nuk prodhoi rezultatet e dëshiruara për shkak të mungesës së armatimit dhe forcës tokësore.
Mirëpo pavarësisht vështirësive, ai ka thënë se Ukraina nuk do të dorëzohet.
“Jemi në fazë të re të luftës dhe ky është fakt”, ka thënë Zelensky në një intervistë për “Associated Press”. Intervista është realizuar në Kharkiv në verilindje të Ukrainës. “Dimri si tërësi është fazë e re e luftës”, ka shtuar ai.
I pyetur nëse është i kënaqur me rezultatin e kundërofensivës, Zelensky ka dhënë përgjigje komplekse. Zelensky ka thënë se frikësohet që lufta mes Izraelit dhe Hamasit do të kërcënojë të lërë në hije konfliktin në Ukrainë, teksa agjendat politike dhe burimet e kufizuara e vënë në rrezik ndihmën ushtarake të Perëndimit për Kievin. Kundërofensiva e shumëpritur, e përkrahur nga miliarda dollarë ndihma perëndimore, përfshirë armatimin e rëndë, nuk prodhoi shumë rezultat.
Tani disa zyrtarë ukrainas janë të shqetësuar nëse ndihmat e ardhshme do të jenë bujare sa ishin deri më tani. Në të njëjtën kohë, depot e armatimit të Ukrainës po zbrazen duke kërcënuar me ngecje luftën kundër forcave ruse.
