Sot ka pasur raportime se serbët në komunat veriore të Kosovës kanë dorëzuar te kryesuesit e kuvendeve komunale kërkesë për inicim të peticionit për largimin e kryetarëve aktualë nga detyra.
Një gjë të tillë e ka mohuar kryesuesi i Kuvendit të komunës së Mitrovicës së Veriut, Nexhat Uglanjin.
Uglanjin ka deklaruar për media se ai nuk ka pranuar asnjë kërkesë për peticion.
“Jo , s’është e vërtetë sepse informata s’është e saktë sepse ata s’janë lajmëru me kërkesë të kryesuesit të kuvendit komunal por janë lajmëru ekzekutivi me një kërkesë që s’janë të kënaqur me shërbimet ndaj qytetarëve dhe me obligimet e kryetarit. Kërkesa nuk ka ardhë në adresën e kuvendit, asnjë lloj peticioni, sepse sipas udhëzimi administrativ kanë fore edhe 10 muaj me prit edhe me u lajmëru në kuvend komunal për cdo lloj peticioni. Kërkesa te na si kuvend komunal nuk u dërgu, a u dërgu te ekzekutivi është për ekzekutivin dhe kryetarin, jo për kryesuesin e kuvendit. Sepse lajmet janë që kërkesa ka ardhë te kryesuesi i kuvendit, kërkesa nuk ka ardhë te kryetari i kuvendit. Ne sipas udhëzimit administriativ dhe nuk merremi me iniciativa individuale të ndonjë organizate që sigurisht është ni provë me tensionu situatën, sepse janë dërgu edhe në komuna tjera. Jam në kontakt me kryesuesit e komunave tjera dhe s’janë dërgu në adresë të kuvendit por të ekzekutivit (zyra e kryetarit). Unë si kryesues i kuvendit s’kam pranu asnjë kërkesë as iniciate nga qytetarë”, tha ai
Nga KQZ-ja ende nuk ka dhënë një përgjigje për këtë çështje
Bashkësia ndërkombëtare ka rekomanduar dorëheqjet e tyre që të organizohen zgjedhje më të shpejta, mirëpo Qeveria ka insistuar në opsionin për peticion, për çka më pas u hartua udhëzimi administrativ.
Ky udhëzim parasheh që kryetarët të shkarkohen pas nisjes së peticionit nga qytetarët.
Sipas këtij udhëzimi, grupi nismëtar para se të nisë mbledhjen e nënshkrimeve duhet ta njoftojë kryesuesin e kuvendit komunal dhe mund ta njoftojë KQZ’në.
Erden Atiq, Izmir Zeqiri, Lulzim Peci dhe Ilir Peci u zgjodhën kryetarë pasi fituan zgjedhjet e 23 prillit, të cilat u karakterizuan me dalje të ulët të qytetarëve.
Pasi ata hyrën në objektet komunale në Veri pati protesta të dhunshme që çuan në lëndime të pjesëtarëve të KFOR’it, Policisë e gazetarëve.
