Ish-presidenti amerikan Donald Trump do të tërheqë mbështetjen amerikane për Ukrainën nëse rikthehet në Shtëpinë e Bardhë vitin e ardhshëm, duke vënë në lëvizje një zinxhir ngjarjesh që do të sjellin shkatërrimin e NATO-s, sipas ish-sekretarit të tij të mbrojtjes, Mark Esper.
Në një intervistë me MSNBC, Esper u pyet se çfarë do të thotë perspektiva e një presidence të dytë Trump për të ardhmen e NATO-s.
“Unë mendoj se një nga gjërat e para që do të ndodhte është se ai do të tërhiqte mbështetjen për Ukrainën,” tha ish-shefi i Pentagonit.
“Sigurisht nëse kjo do të ndodhte, e gjithë përpjekja për të mbështetur Ukrainën në luftën e saj me Rusinë përfundimisht do të shkatërrohej. Nëse Shtetet e Bashkuara largohen nga aleanca, gjithçka shembet”, theksoi ai.
Trump ka deklaruar vazhdimisht se do t’i jepte fund konfliktit në Ukrainë “brenda 24 orëve” nga rizgjedhja e tij, nëse ai do të mundte Presidentin Joe Biden në zgjedhjet e vitit të ardhshëm.
Ish-presidenti ka lënë të kuptohet se ai do të përdorte ndihmën ushtarake si mjet për ta arritur këtë duke ndërprerë fluksin e armëve për të detyruar Kievin në tryezën e bisedimeve me Moskën.
