Kryeministri Albin Kurti ka bërë me dije se sot në mbledhje të Qeverisë do të merret vendimi për mbështetjen e pensionistëve për fundvit.
Në adresimin e tij para kabinetit qeveritar, ai ka thënë se shuma e ndarë do të jetë nga 100 euro.
“Në këtë vit nuk kemi harruar as pensionistët tanë. Po ashtu do të kujdesemi me një vendim tjetër në këtë mbledhje. Prandaj, për të gjithë pensionmarrësit këtë fundvit me qëllim të lehtësimit të kostos së jetesës për këtë kategori të cenueshme do të miratojmë shtesën e njëhershme prej 100 euro, përveç pensionit të rregull mujor që marrin”, ka thënë Kurti.
Kurti ka bërë të ditur se sivjet Qeveria dëshiron që të gjithë fëmijët të mbështeten me nga 100 euro.
“Kam kënaqësinë që sot do të miratojmë një vendim i cili përmbushë një premtim tonin të radhës. Është fjala për subvencionimin e të gjithë fëmijëve, bazuar në të ardhurat e familjes. Kemi premtuar që çdo vit, secili fëmijë do të përfitojë 50, 100 apo 150 euro, varësisht nga të ardhurat e prindërve”.
“Sivjet kemi vendosur që të gjithë fëmijët, pa dallim, të fitojnë nga skema dhe shuma të jetë 100 euro. Planifikojmë që kjo skemë të sofistikohet edhe më tutje, duke filluar zbatimin e deklarimit të të ardhurave vjetore nga të gjithë prindërit përfitues, ashtu që të ketë edhe dallim në mbështetje. Për ata që kanë më pak të ardhura, natyrisht se përfitojnë më shumë”.
