Të paktën katër persona u vranë të martën në mëngjes në një bombardim të ri masiv të Ukrainës nga Rusia, sipas autoriteteve ukrainase.
Në Kiev, një grua e moshuar vdiq nga plagët e saj në një ambulancë, sipas kryebashkiakut Vitali Klitschko.
Gjashtë rrethe të kryeqytetit u prekën, duke lënë të paktën 27 të plagosur dhe duke shkaktuar shtatë zjarre.
Dy persona u vranë në rajonin e Kievit dhe shtatë të tjerë u plagosën, sipas ministrit të Brendshëm Igor Klymenko.
Një grua 91-vjeçare vdiq në Kharkiv, sipas guvernatorit të rajonit me të njëjtin emër, Oleg Synegoubov, i cili raportoi 44 të plagosur, pas sulmeve ruse në qytetin e dytë të Ukrainës, që ndodhet jo shumë larg kufirit rus.
Nuk kishte asnjë tregues të menjëhershëm për numrin e raketave apo dronëve të rrëzuar dhe të atyre që rrëshqitën nëpër çarjet e mbrojtjes ajrore të Ukrainës.
Intensifikimi i veprimeve luftarake
Të premten, një seri sulmesh me raketa kundër Ukrainës la rreth 40 njerëz të vdekur dhe 25 njerëz u vranë të nesërmen në një bombardim ukrainas në Belgorod, Rusi.
Të hënën, presidenti rus premtoi, në shenjë hakmarrjeje, një intensifikim të ofensivës së tij.
“Ne do të intensifikojmë sulmet, asnjë krim kundër civilëve nuk do të mbetet i pandëshkuar, kjo është e sigurt,” tha Putin gjatë një vizite në një spital ushtarak.
“Ne po godasim me armë precize vendet e vendimmarrjes, vendet ku mblidhen ushtarët dhe mercenarët, qendrat e tjera të këtij lloji, mbi të gjitha instalimet ushtarake”, tha ai, duke e cilësuar si “akt terrorist” bombardimin e Belgorodit.
Putin megjithatë konsideroi se Ukraina nuk ishte “armik” në vetvete dhe akuzoi Perëndimin se përdor autoritetet e Kievit për “të zgjidhur problemet e tyre” me Rusinë.
